Parlament seçkisində namizədliyi qeydə alınmış Ayaz Mütəllibovun toxunulmazlıq hüququnun ləğv olunması və barəsində həbs qərarının icra edilməsinə dair baş prokurorun qərarından məhkəməyə şikayət veriləcək. Bu barədə Trend ə Azərbaycan Sosial Demokrat Partiyasının (ASDP) həmsədri Araz Əlizadə məlumat verib.
O, bildirib ki, baş prokurorun sentyabrın 6-da Daxili İşlər Nazirliyinə verdiyi tapşırığı tamamilə qanunsuzdur. A.Əlizadənin sözlərinə görə, Respublika Prokurorluğunun qərarında xeyli ziddiyyətli və qaranlıq məqamlar var: "Prokurorluğun məlumatında deyilir ki, Ayaz Mütəllibovun barəsində 2003-cü ildə Nəsimi rayon məhkəməsi qərar çıxarıb. Əvvəla bu, bizim üçün tamilə gözlənilməz oldu.
Nə üçün məhkəmənin qərarı barədə indiyədək heç kəsə, nə partiyaya, nə Ayaz Mütəllibovun ailəsinə, nə ictimaiyyətə məlumat verilməyib? Bundan başqa niyə Nəsimi rayon məhəkəməsi qərar çıxarıb? Cinayət prosessual Məcəllənin tələblərinə görə təqsirləndirilən şəxsin ya yaşıdığı, ya da işlədiyi ərazinin məhkəməsi onun barəsində qərar çıxarmalıdır. Ayaz Mütəllibov isə Nəsimi rayonu ərazisində nə yaşayıb, nə də işləyib"-deyə A.Əlizadə bildirib.
ASDP həmsədri qeyd edib ki, A.Mütəllibovun Nəsimi rayonu ərazisində hansı cinayəti törətdiyi də göstərilməyib. A.Əlizadə əlavə edib ki, 2003-cü ildə çıxarılmış Nəsimi rayon məhkəməsinin qərarından da şikayət veriləcək. A.Mütəllibovun məhkəmə işləri ilə bağlı ASDP artıq vəkil Fuad Ağayevlə müqavilə bağlayıb.
