"Azadlıq" və "Yeni Siyasət" bloklarının parlament seçkisində vahid namizədlərlə iştirak etməsi üçün xüsusi Razılaşdırılmış Komissiya yaradılıb. Bu barədə Trend ə "Yeni Siyasət" blokunun həmtəsisçisi Eldar Namazov məlumat verib. O, bildirib ki, "Yeni Siyasət" bloku "Azadlıq" bloku liderlərinə müraciətlə həm Razılaşdırılmış Komissiya yaradılmasını təklif edib, həm də bu komissiyaya öz nümayəndələrini irəli sürüb. "Azadlıq" bloku ilə danışıqlar aparmaq, hər iki tərəfin nümayəndələrindən ibarət komissiya formalaşdırmaq işi Azərbaycan Milli İstiqlal Partiyasının (AMİP) sədri Əli Əliyevə həvalə olunub.
Eldar Namazov bildirib ki, bloklar arasında imzalanacaq 6 bəndlik sazişin şərtləridən biri də seçkidə vahid namizədlə iştirak etməkdir. Ona görə də Razılaşdırılmış Komissiya "Yeni Siyasət" və "Azadlıq" bloklarının biri digərinin xeyrinə namizədlərini geri çəkməsi, hər dairədə vahid namizədlərinin olması ilə məşğul olacaq.Komissiya hər iki blokun bütün namizədləri ilə bağlı araşdırma aparacaq, hər bir seçki dairəsində hansı namizədin daha çox şanslı olduğunu müəyyənləşdirəcək, bloklara təkliflərini verəcək. E.Namazov qeyd edib ki, bu iki seçki blokunun hər dairədə vahid namizədlərinin olması üçün "Yeni Siyasət" bloku özü bütün mümkün olan dairələrdə "Azadlıq"a güzəştə getməyə hazırdır. Onun sözlərinə görə, Razılaşdırılmış Komissiya bununla bağlı işini yekunlaşdırdıqdan sonra tərəflər arasında saziş imzalanacaq.