"Demokratik Azərbaycan seçki bloku fəaliyyətini dayandırıb". Bu barədə Trend ə adıçəkilən blokun təsisçilərindən olan Azadlıq Partiyasının sədri Əhməd Oruc bildirib.
Ə.Oruc qeyd edib ki, bu barədə qərar blokun Sədrlər Şurasının növbəti toplantısında qəbul edilib: "Blokda təmsil olunan üç partiyanın - Azadlıq, Ədalət və Vahid Azərbaycan Milli Birlik Partiyalarının seçkilərin nəticələri ilə bağlı mövqeyi Vətəndaş Həmrəyliyi Partiyasının mövqeyi ilə üst-üstə düşmədiyindən fəaliyyətimizə xitam verdik".
Azadlıq Partiyasının sədri onu da bildirib ki, Azadlıq, Ədalət və Vahid Azərbaycan Milli Birlik Partiyaları öz fəaliyyətini digər qurumda davam etdirə bilər: "Konstitusiya Məhkəməsinin seçkilərlə bağlı qərarını gözləyirik".
Onu da qeyd edək ki, Vahid Azərbaycan Milli Birlik Partiyasının sədri Hacıbaba Əzimov Trend ə bildirib ki, onu blokun Sədrlər Şurasının toplantısına dəvət etməyiblər. Ə.Oruc isə qeyd edib ki, H.Əzimov bu barədə məlumatlı olub.