Mayın 11-də Azərbaycanın fövqəladə hallar naziri Kəmaləddin Heydərov Koreya Respublikasının ölkəmizdə səfərdə olan tikinti və nəqliyyat naziri Çu Dyunq Jiki qəbul edib. Bu barədə Trend ə Fövqəladə Hallar Nazirliyinin ictimaiyyətlə əlaqə idarəsindən məlumat verilib.
Görüş zamanı tərəflər Azərbaycan Prezidenti İlham Əliyevin dəvəti ilə Koreya Respublikasının Prezidenti Ho Mu Hyunun Azərbaycana rəsmi səfərini yüksək qiymətləndiriblər.
K.Heydərov qonağın nəzərinə çatdırıb ki, Koreya Respublikasının Prezidentinin Azərbaycana səfəri çərçivəsində imzalanan mühüm sənədlərdən biri də "Azərbaycan Respublikası Fövqəladə Hallar Nazirliyi və Koreya Respublikasının Tikinti və Nəqliyyat Nazirliyi Arasında Tikinti Sahəsində Əməkdaşlıq barədə Anlaşma Memorandumu"dur.
K.Heydərovun sözlərinə görə, tikinti sahəsində qabaqcıl texnologiyaları və təcrübələri bölüşmək, elmi-tədqiqat və təcrübə-konstruktor işləri aparmaq qarşılıqlı nailiyyətlərin əldə olunmasını təmin edəcək.
Çu Dyunq Jik isə söhbət əsnasında yeni yaranmış Fövqəladə Hallar Nazirliyinin müstəqil Azərbaycan dövlətinin əsas qurumlarından biri kimi fəaliyyət istiqamətləri ilə maraqlanıb. Qonağa qurumun fəaliyyət istiqamətləri barədə ətraflı məlumat verilib.
Görüşdə tərəflər arasında rəhbərlik etdikləri qurumların fəaliyyəti sahəsində fikir mübadiləsi aparılıb.
Trend-in ən mühüm və maraqlı xəbərlərini "Telegram"da izləyin
