Yeni mobil operator Azerphone bu ilin oktyabrından başlayaraq vətəndaşlara rabitə xidməti göstərməyi öhdəsinə götürür. Bu barədə Trend agentliyinin məlumatına əsasən, iyunun 2-də rabitə və informasiya texnologiyaları naziri Əli Abbasov bildirib.
Onun sözlərinə görə, hazırda Azərbaycan ərazisində şəbəkənin yaradılması istiqamətində iş aparır.
Bu müddət ərzində Azerphone Bakı, Abşeron yarımadası və Gəncə, Mingəçevir, Əli-Bayramlı, Quba kimi rayonlarda telekommunikasiya şəbəkəsi yaradacaq. Bundan əlavə, ilin sonunda 10 rayon mərkəzi, o cümlədən, Bakı-Quba və Bakı-Gəncə magistral yolu da əhatə dairəsinə qoşulacaq.
Azerphone şirkəti mobil rabitə xidməti haqqında lisenziyanı Rabitə Nazirliyi kollegiyasının 28 dekabr 2005-ci il qərarı ilə alıb. Şirktəin təsisçiləri aşağıdakılardır: Aztelekom İstehsalat Birliyi (10%), Almanyianın Siemens şirkəti (30%) və 2 Britaniya şirkəti (60%).
Layihənin əsas tələbi 2 il ərzində Azərbaycan ərazilərinin 85%-ni mobil rabitələ təmin etməkdir. Şirkət 2 il ərzində $300 mln. həcmində investisiya qoymağı planlaşdırır.