Noyabrın sonunadək Qazax Olimpiya İdman Kompleksinin istifadəyə verilməsi gözlənilir. Bu haqda məlumatı Trendə Qazax rayon Gənclər və İdman İdarəsinin rəisi Vüqar Nəbiyev verib.
Onun sözlərinə görə, yeni tikilən kompleksdə üzgüçülük hovuzu, mini futbol meydançası, tenis kortu, 300 nəfərlik tamaşaçı tribunası, boks, ağır atletika və digər idman növləri üzrə məşğələ və yarışların keçirilirməsi üçün böyük zal tikilir. 14 hektarlıq ərazisi olan 4 mərtəbədən ibarət olimpiya kompleksində yeməkxana da istifadəyə veriləcək. "Qazaxda yalnız bir mehmanxananın olduğunu nəzərə alaraq, kompleksin nəzdində daha bir mehmanxananın da tikintisinə başlanılıb. Burada 16 kotecdən 9-u 2 mərtəbədən, 7-si isə 1 mərtəbədən ibarətdir" - deyən V. Nəbiyev əlavə etdi ki, tikinti işləri Azərbaycan Dövlət Neft Şirkətinin vəsaitləri hesabına həyata keçirilir. Artıq son tamamlama işlərinin aparıldığını deyən müsahib bu ayın sonunadək kompleksin tam istifadəyə hazır olacağını söylədi.
