Bərdə rayonunun Gəncə və Nüşabə küçələrində yaşayan 100-ə yaxın sakin avtomobil yolunu 1 saata yaxın bağlayıb. Trend in regional müxbiri xəbər verir ki, yolun bağlanmasının səbəbini sakinlər belə izah edir ki, 4 aydan artıqdır ki, işıq, qaz və suları yoxdur.
Onların sözlərinə görə, işıq gün ərzində 1-2 saat yanır. İşıq olmadığı üçün artezianlarda mühərrikləri də işlətmək olmur. Ona görə də içməli su da yoxdur. Sakinlər məcbur qalıb ibtidai üsullarla başqa yerlərdən içməli su gətirməli olurlar. Baxmayaraq ki, hər ay vaxtı-vaxtında sakinlər qaz, işıq və su pullarını verirlər. Bununla bağlı aidiyyəti orqanlara dəfələrlə müraciət etsələr də, nəticəsi yoxdur. Aksiyaya da əlagədar orqanlardan heç kim gəlmədi.
Bərdə rayon polis şöbəsinin əməkdaşları aksiya iştirakçılarına qarşı zor tətbiq göstərib, aksiyanı dağıdıb, yolu açdılar. Ancaq aksiya iştirakçıları aksiyanı davam etdirməkdə iddialıdır.
Qeyd edək ki, ötən gün Ağdam rayonunun Quzanlı kəndinin Finiski qəsəbəsində yaşayan Ağdam rayonunun 150 yaxın məcburi köçkünü də axşam saat 23:30-dan başlayaraq qəsəbədə aksiya keçiriblər. Onların da əsas problemi işığın yanmamasıdır.
