Gəncə şəhər İcra Hakimiyyətinin başçısı Eldar Əzizov şəhərin Yeni Gəncə qəsəbəsində inşa edilən "Nəhəng daş" ticarət mərkəzinə baş çəkib. Trendin Qərb Bürosunun verdiyi məlumata görə, səfərdə məqsəd icra başçısının tikinti işləri ilə maraqlanması olub. "Burda təmir işləri zəif aparılır. Satıcılara təklif olunan yerlərin nə asfalt örtüyü var nə də ki, damı. İlk növbədə lazımi şərait yaradılmalıdır ki, bura normal qaydada fəaliyyət göstərsin".
Satıcılar da yeni yarmarkada lazımı şəraitin olmamasından şikayətləndilər. Eldar Əzizov tezliklə "Nəhəng daş"ın yüksək səviyyəli bir ticarət obyekti olacağını bildirdi və yarmarka rəhbərinə tapşırıqlar verdi.
Qeyd edək ki, bir neçə gün bundan əvvəl şəhərin Qatır Məmməd adlanan ərazisində fəaliyyət göstərən "İnam" ticarət mərkəzinin fəaliyyəti dayandırılaraq sökülməyə başlanılıb. Yarmarka Yeni Gəncə qəsəbəsində inşa edilən "Nəhəng daş" ticarət obyektinə köçürülüb.
