"Müxalifətin görüntü xarakterli heç bir tədbirlərdə iştirak etməyəcəyik. Çünki görüntü yaratmaq üçün atılan addımların, qurulan birliklərin vaxtı artıq keçib". Bu fikirləri Trend ə açıqlamasında "Yeni Siyasət" blokunun həmtəsisçisi Eldar Namazov bildirib.
Qeyd edək ki, bir müddət əvvəl bütün müxalifət partiyalarının iştirakı ilə söz və mətbuat azadlığının müdafiəsi üzrə Koordinasiya Şurası adlı qurum yaradılıb, bir neçə dəfə müxalifət rəhbərləri bir araya gələrək müzakirələr aparıblar.
Eldar Namazov qeyd edib ki, "Yeni Siyasət" bloku üzvləri jurnalistlərin etiraz aksiyalarına münasibətini bildirib, aclıq edənlərə baş çəkib. O, təmsil etdiyi qurumun azad mətbuatın müdafiəsində dayandağını deyib. Lakin müxalifətçilərin Koordinasiya Şurası, yaxud bu tipli digər yeni qurumlarda təmsil olunmağı Eldar Namazov düzgün hesağ etmir. Onun fikrincə, bunun effekti yoxdur və nəticə vermir.
"Mətbuatın müdafiəsi üçün yaradılmış Koordinasiya Şurası adlı qurumun fəaliyyəti gözəçarpan deyil. Bundan başqa, partiyalar Şurada toplandılar, lakin sonra bir-birilərinə qarşı ittihamlar irəli sürdülər. Ona görə də yeni formatda, yeni qurumlarda təmsil olunmağı məqbul saymırıq. Ümumiyyətlə, biz görüntü xarakterli heç bir tədbirlərdə iştirak etməyəcəyik. Real və ciddi birliklərin yaradılmasının tərəfdarıyıq, lakin yalançı birliklərin əleyhinəyik"-deyə E.Namazov vurğulayıb.
Qeyd edək ki, keçmiş dövlət katibi Eldar Namazovun və digər ictimai, siyasi xadimlərin təşəbbüsü ilə 2005-ci ildə parlament seçkilərində blok şəklində iştirak etmək üçün "Yeni siyasət" seçki bloku yaradıldı. Müxalifətyönlü qurumun siyasi bloka çevrilməsi üçün işlər görülür.