Bərdə rayonuna Səhiyyə Nazirliyi tərəfindən 9 nəfərlik həkim heyəti gəlib. Həkimlər rayonun Mərkəzi xəstəxanası və şəhər poliklinikasında olublar. Səhiyyə nazirliyinin 185 saylı fərmanına əsasən, həkim heyəti rayon ərazisində müvəqəti məskunlaşan qaçqın və məcburi köçkünlər, eləcə də aztəminatlı ailələr üçün pulsuz müayinələr təşkil edəcək. Muayinələri mama-ginekoloq, terapevt, cərrah və burun-boğaz-qulaq həkimləri aparacaq.
Bərdə Rayon Mərkəzi Xəstəxanasının baş həkimi Etibar Mirzəyevin Trend in bölgə müxbirinə verdiyi məlumata görə, müayinə olunan xəstələrə təyin olunmuş dərman preparatları dövlət tərəfindən pulsuz veriləcək. Səhiyyə nazirliyinin baş nervopotoloqu Ramin Mirzəyev bildirib ki, nazirlik tərəfindən bu cür tədbirlər respublikamızın digər bölgələrində də keçiriləcək. Bu gün muayinəni Bərdə rayonu ərazisində apardıqdan sonra həkim briqadası Tərtər rayonunda olacaq.
R. Mirzəyev onu da qeyd etdi ki, əgər hər hansı bir xəstənin burada müayinəsi xəstəxananın şəraitinə görə mümkün olmasa, həmin xəstə Bakı şəhər Mərkəzi Xəstəxanasına aparılıb pulsuz müayinə olunacaq. Qeyd edək ki, həkim qrupu müayinə apararkən daha çox uşaqlar arasında sinir sistemi xəstəliyinə təsadüf olunub.