Gəncədə hələ ötən ildən başa çatmalı olan sayğaclaşma prosesinin demək olar ki, yalnız 50 faizi başa çatdırılıb. Bu haqda məlumatı Gəncə şəhər qaz İstisamarı İdarəsinin rəisi Adil Bağırov verib.
Müsahibin sözlərinə görə, Gəncədə 2006-cı ildə 62 min 713 abonent sayğac quraşdırılmalı olsa da, yalnız 36 min 476 abonent qaz sayğacı ilə təmin edilib. A. Bağırov əlavə etdi ki, "Azəriqaz" Səhimdar Cəmiyyəti Gəncədə bütün abonentlərin sayğacla təmin edilməsi üçün müddəti daha 3 ay da artırıb. Bu müddət ərzində şəhərdə 26 min 237 sayğac quraşdırılmalıdır.
"Bu, təxminən ötən il ərzində quraşdırılandan bir qədər azdır. Sayğac quraşdıran şirkətlər 3 ay ərzində daha çox çalışmalıdırlar ki, tapşırığın öhdəsindən gələ bilsinlər"-deyə idarə rəisi qeyd etdi.
Adil Bağırov IV mikrarayonda hələlik təcrübi olaraq kartla işləyən sayğacların quraşdırılduğunu bildirdi.