Bir neçə müxalifət partiyası "Azadlıq" blokunun yanvarın 26-da Bakının mərkəzi yerlərində keçirəcəyi etiraz aksiyasını dəstəkləyir. Azərbaycan Milli İstiqlal, Ədalət, Ümid, Müsavat partiyalarından Trend ə bildirilib ki, bu partiyaların üzvləri fərdi qaydada etiraz aksiyalarına qoşulacaqlar.
Ədalət Partiyasının sədri İlyas İsmayılov bildirib ki, o, partiyasının üzvlərinə müxalifətin etiraz tədbirlərinə iştirak etmələrinə heç bir qadağa qoymayıb. İ.İsmayılovun sözlərinə görə, Ədalət Partiyasında arzu edən hər bir kəs həm "Azalıq" blokunun, həm də Müsavat Partiyasının mitinqinə gedə bilər. Ümid Partiyasının sədri İqbal Ağazadə isə qeyd edib ki, onun partiyası bu tədbirlərdə iştirak etməyə dair rəsmi qərar verib. Çünki Ümid Partiyasının qiymətlərin bahalaşmasına etiraz olaraq təşkil etmək istədiyi mitinq baş tutmadığından onlar "Azadlıq" bloku və Müsavat Partiyasının aksiyalarında iştirak etməklə öz etirazlarını bildirəcəklər. AMİP-in sədri Ayaz Rüstəmov da bildirib ki, bu mitinqin təşkilatçıları ilə heç bir danışıq və müzakirə aparılmayıb, ona görə də partiya olaraq "Azadlıq" bloku və Müsavatın tədbirlərinə qoşulmur. Lakin AMİP-in üzvləri fərdi qaydada bu mitinqlərdə iştirak edəcəklər. Artıq partiyanın mətbuat xidmətinin rəhbəri Əli Orucov və digər funksionerlər sabahkı aksiyada təmsil olunacaqlarını deyiblər. Müsavat Partiyası da öz üzvlərinə bu məsələdə sərbəstlik verib. Partiyanın Mərkəzi İcra Aparatının rəhbəri Arif Hacılı qeyd edib ki, "Azadlıq" blokunun şəhərin hansı hissəsində aksiyası baş tutacaqsa, Müsavat üzvlərinə orada iştirak etmək tapşırığı verilib.
Digər müxalifət partiyalarının rəhbərləri isə icazəsiz aksiyada iştirak etməsələr də, "Azadlıq" blokunun tələblərini dəstəklədiklərini bildiriblər.
Qey edək ki, "Azadlıq" blokunda 4 müxalifət partiyası- Azərbaycan Xalq Cəbhəsi (AXCP), Liberal, Vətəndaş və İnkişaf (VİP), Azərbaycan Demokrat (ADP) partiyaları təmsil olunur. Blok ölkədə enerjidaşıyıcılarının, kommunal xidmətlərin qiymətinin bahalaşmasına etiraz olaraq aksiya keçirmək niyyətindədir.
