"Bu gün hakim Yeni Azərbaycan Partiyasının sədri, prezident İlham Əliyevə məktub göndərdik və iqtidarla siyasi dialoqa hazır olduğumuzu bildirdik". Bu fikirləri Trend ə açıqlamasında "Azadlıq" blokunun həmtəsisçisi, Azərbaycan Demokrat Partiyası (ADP) sədrinin birinci müavini Sərdar Cəlaloğlu bildirib.
O, qeyd edib ki, ADP iqtidara qarşı digər mübarizə üsulları ilə yanaşı siyasi dialoqa da üstünlük vermək barədə qərar çıxarıb. Bu məqsədlə iqtidara müraciət ünvanlanıb. Bu məsələ "Azadlıq" bloku Sədrlər Şurasının bügünkü toplantısında da müzakirə edilib və qərara gəlinib ki, iqtidar-müxalifət dialoqu "Azadlıq" bloku ilə hakim partiya arasında aparıla bilər. S.Cəlaloğlu eyni zamanda ADP-nin müxalifət mövqeyində qaldığını, lakin hakimiyyətə münasibətini dəyişdiyini vurğulayıb: "Adətən bir məqsədə bir neçə yolla çatmaq olar. Biz indi əlavə bir yola da əl atırıq və düşünürük ki, bu, xalqımızın, dövlətimizin mənafeyinə xidmət edən yol olacaq".
S.Cəlaloğlu qeyd edib ki, ADP bundan sonra keçiriləcək bütün etiraz aksiyalarında iştirak edəcək: "Etiraz aksiyaları zəruri olacaqsa, orada hamı, o cümlədən YAP da iştirak etməlidir. Sadəcə olaraq hesab edirik ki, əgər iqtidarla siyasi dialoq qurulmasına çalışırıqsa, belə bir vaxtda ona qarşı etiraz aksiyaları keçirməyin mənası və məntiqi yoxdur. Dialoq yolu ilə nəyəsə nail olunmayacaqsa, o zaman digər üsullardan da istifadə edəcəyik".