Yalnız bu ilin əvvəlindən Rusiyadakı Azərbaycan səfirliyinin konsulluq şöbəsi Rusiya ərazisində olan və yaşayan həmyerlilərimizə təxminən 3000 sənəd verib. 2006-cı ildə Azərbaycana qayıtmaq üçün vətəndaşlarımıza 21620 vəsiqə verib. Bizim ölkəyə gəlmək üçün xarici vətəndaşlara 368 viza verilib. Respublikanın DİN-ə 2500 ərizə göndərilib, RF-nin müxtəlif orqanlarına 1500 məktub ünvanlanıb. Bu barədə Trend in Moskvadakı xüsusi müxbirinə Azərbaycanın Rusiyadakı səfirliyinin konsulluq şöbəsinin rəhbəri Etibar Xəlilov məlumat verib.
Diplomatn sözlərinə görə, gün ərzində konsulluq orta hesabla 100-120 vətəndaşımızı qəbul edir. Onlar həmin gün bütün lazımi sənədləri alırlar. Əsasən insanlar qayıdış haqqında vəsiqə, məhkəməyə cəlb olunma barədə ərizə, vətəndaşlıq mənsubiyyəti vəsiqəsinin alınması üçün müraciət edirlər. E. Xəlilov bəzi hallarda gecikmələrin olduğu barədə də məlumat verdi. Gecikmələr bu və digər sənədi almaq arzusunda olan şəxs haqqında məlumatların dəqiqləşdirilməsi üçün Bakıdan tələb olunan sənədlərlə bağlıdır. "Lakin hazırda bu prosedurun sadələşdirilməsi barədə Bakının müvafiq instansiyaları ilə danışıqlar aparılır", deyə o, qeyd edib.
Yeni miqrasiya qaydalarının qüvvəyə minməsindən sonra konsulluğa müraciət edən həmyerlilərimizin azalması barədə suala cavab olaraq E. Xəlilov bildirib ki, müraciət edənlərin sayı azalmayıb. Belə ki, RF-də vətəndaşlarımızın leqallaşdırılması və işədüzəlmə ilə bağlı müxtəlif ərizələrin alınmasına zərurət yaranıb.
"Hamı Rusiyadan köçüb gedəcək həmyerlilərimizin sayının artmasını gözləyirdi, lakin məlum olub ki, bir çoxları Rusiyada leqallaşmaq arzusundadır. Bir çox vətəndaşlar uzun müddət lazımi sənədlərsiz yaşayıb və əvvəllər bu mümkün olub. Bu gün bu qaydaların pozulması məsuliyyətinin kəskinləşdirilməsi barədə yeni miqrasiya qanunvericiliyi qüvvəyə minib. Bu səbəbdən konsulluğa müxtəlif sənədlər üçün müraciət edən həmyerlilərimizin sayı azalmayacaq. Belə ki, hamı bu sənədləri rəsmiləşdirməyə məcburdur ", deyə, E. Xəlilov deyib.
Qeyd edək ki, hazırda konsulluğun qəbul otağı təmirdən çıxıb və vətəndaşların qəbulu üçün 6 pəncərə açılıb, növbənin avtomatlaşdırılması sistemi qoyulub, küçədə növbənin ardıcıllığı üçün turniketlər quraşdırılıb. Həmçinin tabloda doldurulmalı olan bütün sənədlərin forması və bu sənədlər üçün dövlət rüsumunun dəyəri göstərilib.
