Azərbaycan, Bakı / Trend müxbir İ.Əlizadə/ Klassik Xalq Cəbhəsi Partiyasının (KXCP) müxalifətin yeni birliyinin yaradılması üçün bu düşərgəyə daxil olan partiyalarla apardığı danışıqlar yekunlaşmaq üzrədir. KXCP sədri Mirmahmud Mirəlioğlu bildirib ki, yaxın günlərdə müxalifətin yeni birliyinin yaradılması rəsmən elan olunacaq.
Lakin M.Mirəlioğlu yeni birliyin yaradılması ilə bağlı danışıqların hansı partiyalarla aparıldığını açıqlamayıb.
"Danışıqlar güclü sosial bazası, Azərbaycan cəmiyyətində sözü və çəkisi olan partiyalarla aparılır. Bura "Azadlıq" blokuna daxil olan partiyalar və Müsavat Partiyası da daxildir", -deyə KXCP sədri əlavə edib.
Onun sözlərinə görə, yeni birliyin yaradılmasında məqsəd mövcud porblemlərin birgə həll yollarını tapmaqdan ibarətdir.
Qeyd edək ki, 2006-cı il mart ayında müxalifəti təmsil edən Klassik Xalq Cəbhəsi Partiyasının təsis qurultayı keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb və bir müddət əvvəl partiya qeydiyyata alınıb.
