Azərbaycan, Bakı / Trend müxbir İ.Əlizadə/ Müsavat Partiyasının sonuncu qurultayında nəticələrin saxtalaşdırılmasına cəhdlərin olub-olmadığını araşdırmaq üçün yaradılan komissiya işini yekunlaşdırmaq üzrədir. Müsavat Məclisinin sədri Sülhəddin Əkbər bildirib ki, araşdırmaların nəticələri haqqında cəmiyyətə məlumat verilməsi vacibdir.
"Çünki bu komissiyanın yaradılmasından xeyli vaxt keçib. Cəmiyyət də nəticələrlə bağlı məlumat almaq istəyir. Hesab edirəm ki, nəticələr barədə məlumat verilməsi vacibdir", -deyə Məclis sədri vurğulayıb.
S.Əkbər qeyd edib ki, qurultayda keçirilən səsvermənin nəticələrini saxtalaşdırmağa cəhd edənlərin fəaliyyətini araşdıran komissiyaya Müsavat başqanı İsa Qəmbər rəhbərlik edir. Ona görə də bununla bağlı geniş danışmaq istəmir: "Mən Məclis sədri kimi bu komissiyanın işi ilə maraqlanmışam. Araşdırmalar başa çatıb və müəyyən nəticələr var. Yaxın günlərdə İsa Qəmbər bununla bağlı açıqlama verəcək."
Müsavatın qurultayında saxtalaşdırmanın olması haqqında yayılan məlumatlar partiya daxilində ciddi narazılıq yaratmışdı. Bunu araşdırmaq üçün komissiya yaradılsa da, xeyli vaxt keçməsinə baxmayaraq heç bir açıqlama verilməyib.
Qeyd edək ki, müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya hazırda parlamentdə 5 deputatla təmsil olunur.
