Azərbaycan, Bakı / Trend müxbir E. Hüseynli/ Gəncə şəhər Baş Polis İdarəsi əməkdaşlarının keçirdiyi əməliyyat nəticəsində silahlı dəstə zərərsizləşdirilib. Bu barədə Gəncənin hüquq-mühafizə orqanlarındakı mənbələrdən məlumat verilib. Məlumata görə, silahlı dəstə Gəncədə bir nece evə basqın edib. Dəstə sonuncu dəfə fevralın 7-dən 8-nə keçən gecə Gəncə şəhəri Nizami rayonu ərazisində silahlı basqın hadisəsi törədib. Nəriman Nərimanov prospekti 377 ünvana daxil olan 4 silahlı evi talan edib. Həmin vaxt maskalılar evdən təxminən 13000 dollar məbləgində pul götürüblər. Basqın zamanı ailənin 4 üzvü evdə olub. Basqınçılar ailənin üzvlərindən birinin əlini baglayaraq, hədə-qorxu ilə pulun yerini deməyi tələb ediblər. Ailə üzvləri isə pulun yerini göstərməyiblər. Basqınçılar özləri evdə axtarış apararaq onlara lazım olan pulu tapıblar. Bundan sonra Daxili İşlər Nazirliyi (DİN), Respublika Prokurorlugu və Gəncə şəhər Baş Polis İdarəsinin peşəkarlarından ibarət əməliyyat-istintaq qrupu yaradılıb. Bir ay müddətində dəstənin bütün üzvləri və başçısı zərərsizləşdirilib.Gəncə şəhər Prokurorlugundan Trend ə verilən açıqlamada silahlı dəstənin zərərsizləşdirilməsi təsdiqlənib. İstintaq sirri oldugundan bandanın başçısı və üzvləri barədə məlumat verilmir.
Gəncə şəhəri paytaxt Bakıdan 368 kilometr aralıda yerləşir. Azərbaycanın ikinci böyük şəhəri hesab olunur, 300 mindən artıq əhalisi var.
