Azərbaycan, Bakı / Trend , müxbir İ.Əlizadə/ Milli Məclisin İqtisadi siyasət daimi komissiyasının cümə axşamı Bakıda keçirilən iclasında "Dövlət borcu haqqında" qanun layihəsi müzakirə edilib.
Komissiyanın sədri Ziyad Səmədzadə bildirib ki, "Dövlət borcu haqqında" qanun layihəsi dövlət borcalmalarının həyata keçirilməsində, dövlət zəmanətinin verilməsində, borcun idarə olunmasında iştirak edən subyektlər arasındakı münasibətləri tənzimləyir.
İclasda dövlətin sosial-iqtisadi inkişafına yönəldilmiş proqramların həyata keçirilməsinı təmin etmək, büdcə kəsirlərini örtmək, investisiyaları müəyyənləşdirmək sahəsində qanunun çox önəmli bir sənəd olacağı vurğulanıb. Qeyd edilib ki, qanunda dövlət zəmanəti ilə alınan borcların təminat hesabı, xarici və daxili dövlət borcalmaları, dövlət zəmanətinə xitam, borcların reyestri, dövlət öhdəliyi yaratmayan xarici borcalmalar kimi məsələlər də öz əhatəli və aydın əksini tapıb.
Sonra komissiya üzvləri bəzi qanunvericilik aktlarına əlavə və dəyişikliklər edilməsi və "Dövlət qulluğu haqqında" qanuna əlavə və dəyişiklik edilməsi barədə" Azərbaycan Respublikasının 2006-cı il 12 may tarixli 108-III QD nömrəli qanununun qüvvədən düşmüş hesab edilməsi haqqında", eləcə də "Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə" qanun layihələrini müzakirə ediblər.
Deputatların və Maliyyə Nazirliyindən, Milli Bankdan dəvət olunmuş mütəxəssislərin rəy və təklifləri nəzərə alınmaqla sənədlərin Milli Məclisin müzakirəsinə çıxarılması tövsiyə edilib.