Azərbaycan, Bakı / Trend müxbir S.İlhamqızı/ Yeni məşvərət qurumunda birləşən altı siyasi lider arasında bir sıra məsələlərə dair razılıq əldə olunub. Bu barədə məşvərət qurumunda iştirak edən Azərbaycan Demokrat Partiyasının (ADP) sədri Sərdar Cəlaloğlu məlumat verib.
Müxalifətin yeni məşvərət qurumunda Azərbaycan Demokrat Partiyası (ADP), Azərbaycan Sosial Demokrat Partiyası (ASDP), Azərbaycan Milli İstiqlal Partiyası (AMİP), Müsavat, Tərəqqi partiyaları və politoloq Eldar Namazov təmsil olunur.
Cəlaloğlu bildirib ki, ötən gün keçirilən toplantıda bu formatda görüşün davam etdirilməsi və iyulun ilk ongünlüyündə sosial-iqtisadi problemlərlə bağlı tədbir keçirilməsi qərara alınıb.
Cəlaloğlu qeyd edib ki, bu məşvərət qurumu fərqli siyasi mövqeləri olan partiyaların birliyidir və hazırda ən optimal əlaqələndirmə vasitəsidir. Lakin fikir ayrılıqlarına baxmayaraq, bu siyasi qüvvələr informasiya mübadiləsi aparılması, mövqelərin aydınlaşdırılması və uzlaşdırılması, gələcəkdə ümummilli problemlərə dair birgə mövqedən çıxış etmək kimi məsələlərdə razılığa gəliblər: "Hətta daha ciddi proseslərə, məsələn, seçkilərə də birgə addımlar atılması təklif olunur. Ola bilər ki, gələcəkdə prezident seçkisində vahid mövqedən çıxış etmək təklifinə baxılacaq." - deyə Cəlaloğlu qeyd edib.
ADP sədrinin sözlərinə görə, məşvərət qurumunun Əsasnaməsi olmayacaq və bu partiyalar qarşısında hər hansı şərtlər, öhdəliklər də qoyulmayıb.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib.