Azərbaycan, Bakı / Trend müxbir S.İlhamqızı/ "Azadlıq" bloku klassik mənada artıq yoxdur və hazırda real güc mərkəzi deyil. Bu barədə Azərbaycan Demokrat Partiyasının (ADP) sədri Sərdar Cəlaloğlu açıqlama verib.
Xatırladaq ki, 2005-ci ildə parlament seçkilərində birgə iştirak üçün Müsavat, ADP, AXCP və ALP-nin təmsilçiliyi ilə "Azadlıq" seçki bloku yaradıldı. Seçkidən sonra siyasi blok kimi fəaliyyəti davam etdirilən "Azadlıq"ı əvvəlcə Müsavat, bu il isə ADP tərk etdi. Hazırda "Azadlıq"da AXCP, ALP, Vətəndaş və İnkişaf Partiyası təmsil olunur.
Cəlaloğlu qeyd edib ki, iki təsisçi - ADP və Müsavat "Azadlıq" blokunda olmadığı üçün o, artıq yeni bir blokdur. O, həmçinin ADP-nin hazırda təmsil olunduğu müxalifətin məşvərət qurumunun "Azadlıq" blokuna alternativ kimi yaradılmadığını deyib: "İndiki "Azadlıq" bloku vaxtilə yeganə güc mərkəzi olmuş blok deyil. İndiki "Azadlıq" konkret siyasi güc kimi görünmür və blok buna iddialı da deyil. Ona görə də bizim məşvərət qurumu ona alternativ deyil. Siyasi gücün əlamətləri, iş görmə qabiliyyəti olmalıdır. Mən ADP hələ bu blokda təmsil olunan vaxtlarda da deyirdim ki, "Azadlıq" blokunun fəaliyyəti sıfıra bərbərdir, bəzi toplantıları çıxmaq şərtilə, ölkənin siyasi həyatında ciddi iştirak etmir. İndi isə o toplantılar da keçirilmir, həm də ADP bloku tərk edib, deməli,blok artıq zəifləyib" - deyə Cəlaloğlu qeyd edib.
ADP sədri əlavə edib ki, seçki dövrü yaxınlaşdıqca "Azadlıq" blokunun güc mərkəzi kimi siyasi səhnəyə çıxması mümkündür.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib.
