Azərbaycan, Bakı, 21 yanvar / Trend müxbir İ.Əlizadə/ Azərbaycan parlamentində müxalifəti təmsil edən Müsavat deputat qrupu ölkənin "Sərbəst toplaşmaq azadlığı haqqında" Qanuna dəyişiklik edilməsini nəzərdə tutan layihə hazırlayıb. "Hazırda "Sərbəst toplaşmaq azadlığı haqqında" Qanunun dəyişdiriməsi ilə bağlı Azərbaycan hakimiyyəti ilə Avropa Şurasının Venesiya Komissiyası arasında danışıqlar davam edir. Biz də hazırladığımız layihəni Milli Məclisin yaz sessiyasında müzakirəyə təqdim etməyi planlaşdırırıq", -deyə bazar ertəsi Trend ə açıqlamasında Müsavat deputat qrupunun üzvü Pənah Hüseyn məlumat verib.
Azərbaycanda son zamanlar kütləvi aksiyaların keçirilməsi sahəsində ciddi problemlər mövcuddur. Bakı Şəhər İcra Hakimiyyəti kütləvi aksiyaların keçirilməsi üçün dörd yer ayırıb.Lakin son zamanlar Bakı Şəhər İcra Hakimiyyəti yalnız Bibiheybətdə aksiya keçirilməsinə icazə verir. Beynəlxalq təşkilatlar və müxalifət "Sərbəst toplaşmaq azadlığı haqqında" Qanunun dəyişdirilməsini tələb edirlər.
"Azərbaycan Konstitusiyasının 49.1-ci maddəsində yazılıb ki,kütləvi tədbirləri icra hakimiyyəti orqanını, sadəcə, xəbərdar etməklə keçirmək olar. Lakin sonradan "Sərbəst toplaşmaq azadlığı haqqında" Qanun qəbul olunub və orada yazılıb ki, icra hakimiyyəti orqanı aksiya təşkilatçılarına iki iş günü qalmış cavab verməlidir və aksiya icra hakimiyyəti orqanı ilə razılaşdırılmış yerdə keçirilməlidir. Ona görə də Qanun sərbəst toplaşmaqla bağlı Konstitusiyanın müddəasını pozur və bu dəyişdirilməlidir", - deyə Hüseyn əlavə edib.
Hüseyn qeyd edib ki, icra hakimiyyəti orqanının aksiya təşkilatçılarına iki iş günü qalmış cavab verilməsi maddəsi də dəyişdirilməlidir. Çünki bu, aksiyanın təşkil olunmasına ciddi problemlər yaradır: "Təşkilatçılar aksiyanı təyin edirlər, bunu cəmiyyətdə yayırlar, hazırlıq işləri görülür və iki gün qalmış məlum olur ki, icra hakimiyyəti aksiyaya icazə verməyib".
Onun fikrincə, Qanunun kütləvi aksiyanın keçirilməsi üçün yerin ayrılması ilə bağlı maddəsinə də dəyişiklik edilməlidir. Çünki aksiya iştirakçıları bir yer istəyirlər, icra hakimiyyəti isə, iki gün qalmış şəhərin tamamilə fərqli ərazisini təklf edir: "Konstitusiyaya görə, Azərbaycanın bütün şəhər və rayonlarında kütləvi aksiyaların keçirilməsi üçün meydanlar ayrılmalıdır. Bakıda mitinqlərə cəmi dörd yer ayrılıb və onlar bərbad vəziyyətdədir. Hazırladığımız layihədə bu məsələlərə aydınlıq gətiriləcək".
Müsavat deputat qrupunun beş üzvü var.
