Azərbaycan, Bakı, 05 fevral / Trend , müxbir K.Zərbalıyeva/ "Xural" qəzetinin baş redaktoru Əvəz Zeynallı "Azərbaycan" nəşriyyatı direktorunun şikayəti ilə bağlı məhkəmə qərarından apellyasiya şikayəti verib.
Nəşriyyatın direktoru Ağabəy Əsgərov "Xural" qəzetinin baş redaktorunu rəhbərlik etdiyi təşkilatla bağlı dərc olunan yazılara görə Nərimanov rayon məhkəməsinə verib.
Məhkəmə Zeynallının 1000 manat məbləğində cərimələnməsi, təkzib verilməsi və üzr istəməsi barədə qərar qəbul edib.
Baş redaktor Zeynallı çərşənbə axşamı Trend ə bildirib ki, bu gün Bakı Apellyasiya Məhkəməsində şikayət üzrə hazırlıq iclası keçirilib.
İş üzrə məhkəmə baxışı fevralın 12-nə təyin olunub.
Əsgərovun xüsusi ittiham qaydasında şikayəti üzrə isə Nərimanov rayon məhkəməsi Zeynallının 1 il 6 ay müddətinə islah işlərinə cəlb olunması barədə qərar qəbul edib.
Baş redaktor bildirib ki, bu qərardan da apellyasiya şikayəti verilib.
