Azərbaycan, Bakı,08 fevral / " , müxbir K. Zərbalıyeva/ Azərbaycan dövləti ərazisində separatçı "Talış-Muğan Respublikası" yaratdığı üçün cəzalandırılmış Əlikram Hümbətovun işi üzrə Avropa Məhkəməsinin qərarından Böyük Palataya şikayət verəcək.
Bu barədə Trend ə cümə günü etibarlı mənbədən məlumat verilib.
İnsan Haqları üzrə Avropa Məhkəməsi Əlikram Hümbətovun şikayəti üzrə Azərbaycanı 14 min avro məbləğində cərimələyib. Məhkəmənin qərarında Hümbətovun Əsas İnsan Hüquq və Azadlıqları Haqqında Avropa Konvensiyası ilə qorunan işgəncələrin qadağan olunması (3-cü maddə), səmərəli hüquqi müdafiə vasitələri hüququ (13-cü maddə), ədalətli məhkəmə hüququnun (6-cı maddə) pozulduğu qeyd edilib.
Konvensiyaya görə, Avropa Məhkəməsinin qərarları qəbul ediləndən 3 ay sonra hüquqi qüvvəyə minir. Bu müddət ərzində qərarla razılaşmayan tərəf Məhkəmənin Böyük Palatasına şikayət vermək hüququna malikdir.
Azərbaycanın Avropa Məhkəməsindəki səlahiyyətli nümayəndəsi Çingiz Əsgərov yanvarın 30-da jurnalistlərə açıqlamasında dövlətin Avropa Məhkəməsinin bəzi qərarları ilə razılaşmadığını və həmin qərarlardan Böyük Palataya şikayət veriləcəyini bildirmişdi.
Etibarlı mənbə bildirib ki, Azərbaycan dövləti Avropa Məhkəməsinin Hümbətovla bağlı qərarı ilə razı deyil və bu qərardan apellyasiya şikayəti hazırlayır.
Əsgərov cümə günü Trend ə bildirib ki, Avropa Məhkəməsinin Azərbaycana münasibətdə qəbul etdiyi və hüquqi qüvvəyə minməyən dörd qərarı ilə bağlı araşdırma aparır. Səlahiyyətli nümayəndə şikayətin hansı qərardan veriləcəyini və dövlətin həmin qərarın hansı hissəsi ilə razılaşmadığı barədə məlumat verməyib.
Hümbətov 1993-cü ildə Lənkəranda separatçı "Talış-Muğan Respublikası" yaradıb və həmin il də həbs olunub. Ömürlük azadlıqdan məhrum edilmiş Hümbətov 2005-ci ildə prezident tərəfindən əfv olunub.
Azərbaycan vətəndaşlığından məhrum edildilən Hümbətov hazırda Hollandiyada yaşayır.
Hümbətovun şikayəti ilə bağlı qəbul etdiyi qərar Azərbaycana qarşı çıxarılan doqquzuncu qərardır.
Avropa Məhkəməsi Azərbaycana qarşı 11 qərar qəbul edib. Onlardan dördü - Əlikram Hümbətovun, Elçin Abbasovun, İsmayıl İsmayılovun və Nataliya Rəhimovanın şikayətəri ilə bağlı qərarlar hüquqi qüvvəyə minməyib.