Azərbaycan, Bakı, 17 mart/ Trend , müxbir İ.Əlizadə/Azərbaycan Parlamentinin İnsan hüquqları komissiyası BMT-nin "Qadınlara münasibətdə ayrı-seçkiliyin bütün formalarının ləğv olunması haqqında Konvensiyasına" təklif olunan düzəlişi təsdiqləyib. "Düzəliş BMT-nin Qadınlara münasibətdə ayrı-seçkiliyin ləğv olunması üzrə Komitəsinin iclaslarının hər il keçirilməsini nəzərdə tutur" - deyə Azərbaycan Parlamentinin İnsan Hüquqları daimi komissiyasının bazar ertəsi keçirilən iclasında komissiyanın sədri Rəbiyyət Aslanova bildirib.
BMT-nin "Qadınlara münasibətdə ayrı-seçkiliyin bütün formalarının ləğv olunması haqqında Konvensiya"sına əsasən, Qadınlara münasibətdə ayrı-seçkiliyin ləğv olunması üzrə Komitəsinin iclası iki həftədən artıq davam edə bilməz. Lakin Konvensiyada Komitənin iclaslarının nə vaxt keçirilməsi göstərilməyib.
"İclasların vaxtlı-vaxtında keçirilməməsi ayrı-ayrı dövlətlər tərəfindən təqdim olunan məruzələrin Komitədə müzakirəsini gecikdirir. Düzəliş Komitənin fəaliyyətinin növbəti illərdə səmərəliliyinin artırılmasını nəzərdə tutur" - deyə komissiya sədri əlavə edib.
Bundan sonra Komitənin iclaslarının nə qədər davam etməsini BMT Baş Məclisinin təsdiqi ilə konvensiyaya qoşulan dövlətlər müəyyən edəcəklər.
Azərbaycan 1995-ci ildə BMT-nin "Qadınlara münasibətdə ayrı-seçkiliyin bütün formalarının ləğv olunması haqqında Konvensiya"sına qoşulub.
Komissiya sənədin Milli Məclisdə müzakirəyə çıxarılmasını tövsiyə edib.