Azərbaycan, Bakı, 31 mart / Trend ", müxbir İ.Əlizadə/ Azərbaycanda işgəncələrə qarşı mübarizə aparmaq üçün xüsusi qurum yaradılacaq. "Azərbaycan işgəncələrə qarşı mübarizə ilə bağlı beynəlxalq konvensiyalara qoşulub və özünün qanunvericilik bazasını yaradıb.Yaradılacaq qurum Azərbaycanın qoşulduğu beynəlxalq konvensiyaların müddəalarının yerinə yetirilməsini təmin edəcək, işgəncələrə qarşı mübarizəni həyata keçirəcək" deyə bazar ertəsi Trend ə açıqlamasında Milli Məclis Aparatının dövlət quruculuğu üzrə qanunvericilik şöbəsinin müdiri Lətif Hüseynov bildirib.
Ötən il Azərbaycanda 4 nəfər işgəncələrin qurbanı olub. Bu haqda Azərbaycan İşgəncələr Əleyhinə Komitənin ötən ilin yekunlarına aid hazırladığı hesabatda məlumat verilib.
Komitənin sədri Elçin Behbudov cümə günü Trend ə bildirib ki, işgəncə nəticəsində dünyasını dəyişənlərin böyük qismi Müdafiə Nazirliyinin hərbi hissələrində xidmət edən əsgərlər olub.
Hesabatda qeyd olunub ki, ötən il 63 nəfər işgəncələrə məruz qalıb. İşgəncə faktlarının böyük qismi isə polis orqanlarında qeydə alınıb. Behbudovun sözlərinə görə, polis orqanlarında işgəncələr ibtidai istintaq zamanı saxlanılan şəxsdən ilkin ifadə alınarkən verilir.
Hüseynovun sözlərinə görə, işgəncələrə qarşı mübarizə üzrə yeni qurumun hansı formada yaradılması hazırda müzakirə olunur. "Bu dövlət qurumu olmayacaq. Ola bilsin ki, hansısa QHT bu vəzifəni həyata keçirsin. Bu işi həyata keçirəcək QHT-yə dövlət tərəfindən səlahiyyət veriləcək" .
Hüseynov qeyd edib ki, həmin qurum işgəncələrlə mübarizə sahəsində Azərbaycanla beynəlxalq təşkilatlar arasında əməkdaşlığı həyata keçirəcək.