Azərbaycan, Bakı, 02 aprel / Trend , müxbir K.Zərbalıyeva/ Azərbaycanda mətbuat nümayəndələrinin həbsinə etiraz olaraq başlamış aksiyaya daha iki nəfər qoşulub.
"Gündəlik Azərbaycan" və "Realnıy Azerbaydjan" qəzetlərinin baş redaktoru Eynulla Fətullayevə dəstək məqsədilə keçirilən aksiyaya "Yeni Müsavat" qəzetinin baş redaktoru Rauf Arifoğlu və millət vəkili Pənah Hüseyn də qoşulub",-deyə çərşənbə günü Trend a açıqlamasında "Gündəlik Azərbaycan" qəzetinin şef-redaktoru Şahvələd Çobanoğlu deyib.
12 saylı Cəzaçəkmə Müəssisəsində saxlanılan "Gündəlik Azərbaycan" və "Realnıy Azerbaydjan"qəzetlərinin baş redaktoru Fətullayev martın 26-dan həbsdə aclığa başlayıb. Baş redaktor işinə ədalətli və qərəzsiz baxılmasını, həbsdə olan həmkarlarının azadlığa çıxmasını tələb edir, Avropa Şurası və ATƏT-in siyasi məhbus məsələsində konkret müdafiə mexanizmləri ortaya qoymasını istəyir. Fətullayevə dəstək məqsədilə yeddinci gündür ki, "Yeni Müsavat" qəzetinin redaksiyasında "Gündəlik Azərbaycan" qəzetinin şef-redaktoru Şahvələd Çobanoğlu, "Yeni Müsavat" qəzetinin redaktoru Zahid Səfəroğlu və qəzetin əməkdaşı Elşən Balaxanlı, "Yeni Müsavat" qəzetinin əməkdaşı Zamin Hacı və başqaları açılıq aksiyası keçirirlər.
Çobanoglu Azərbaycan Xalq Cəbhəsi Partiyasının sədr müavini Fuad Mustafayev və Azərbaycan Liberal Partiyasının sədr əvəzi Əvəz Temirxanın da bu saatlarda aksiyaya qoşulacağını deyib.
"Bizim Yol" qəzetinin əməkdaşı Natiq Cavadlı çərşənbə günü aclığı dayandırıb. Çobanoğlu bildirib ki, Cavadlının mədəsində kəskin ağrılar başladığından və qan təzyiqi aşağı düşdüyündən aksiya iştirakçıları ondan aclığı dayandırmasını xahiş ediblər.
ADP sədri Sərdar Cəlaloğlu Trend a açıqlamasında bildirib ki, jurnalistlərin etiraz aksiyasına xaricdə yaşayan azərbaycanlıların da dəstək verməsi, onların beynəlxalq təşkilatlara müraciətlər etməsi istiqamətində iş aparılmasına qərar verilib.
Fətullayev Cinayət Məcəlləsinin terororçuluqla hədələmə (214.1-ci), qulluq möveyindən istifadə etməklə milli, irqi, sosial və ya dini düşmənçiliyin salınması (283.2.2-ci) və vergidən yayınma(213.2.2) maddələri ilə təqsirli bilinərək, məhkəmənin hökmü ilə 8 il 6 ay azadlıqdan məhrum edilib.
Azərbaycanda peşə fəaliyyəti ilə bağlı 3 jurnalist- "Azadlıq" qəzetinin baş redaktoru Qənimət Zahid, onun qardaşı, qəzetin əməkdaşı Mirzə Sakit və "Gündəlik Azərbaycan" və "Realnı Azerbaydjan" qəzetlərinin baş redaktoru Eynulla Fətullayev həbsdədir.
Məqalənin müəllifi ilə [email protected] ünvanı ilə əlaqə saxlaya bilərsiniz