Azərbaycan, Bakı, 29 may/ Trend , müxbir E.Babayev/ Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının bu gün keçirilən iclasında 2008-ci il üçün layihələrin maliyyələşdirilməsi ilə bağlı müsabiqənin elan formasını təsdiq edib. Bu barədə cümə axşamı Trend a Şuranın sədri Azay Quliyev məlumat verib.
Trend un arayışı: Prezident İlham Əliyev 2008-ci il aprelin 16-da imzaladığı sərəncamla Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurasının 11 üzvünü təyin edib. Qurumun ilk iclasında millət vəkili Azay Quliyev Şuranın sədri, Tahir Süleymanov sədrin müavini, Vüqar Məcidli isə, Şuranın katibi seçilb. Şuranın əsas məqsədi vətəndaş cəmiyyətinin möhkəmlənməsinə və davamlı inkişafına nail olmaqdan, ictimai əhəmiyyətli problemlərin həllində qeyri-hökumət təşkilatlarının rolunu artırmaqdan ibarətdir. İlin sonunadək dövlət tərəfindən QHT-lərin həyata keçirdiyi layihələr üçün Dövlət Dəstəyi Şurasına 1,5 milyon ğanat vəsait ayrılıb.
Quliyevin sözlərinə görə, iclasda qərarların icra vəziyyəti, maliyyə yardımı almaq üçün ərizənin forması, Şura tərəfindən verilmiş maliyyənin hesabatının verilməsi qaydaları məsələləri müzakirə olunub. Quliyev əlavə edib ki, onlar müsabiqəni elan etməyə hazırdırlar. Lakin Şuraya hələ də yerin ayrılmaması, katibliyin işçilərinin ştat sayının təsdiq olunmaması kimi məsələlər müsabiqənin elan olunmasını yubadır. Maliyyə Nazirliyi maliyyənin açılması ilə bağlı konkret addımlar atan kimi, müsabiqə elan olunacaq.
Məqalə müəllifi ilə əlaqə ünvanı: [email protected]
