Azərbaycan, Bakı, 04 iyun / Trend , müxbir R.Ergün/ Azərbaycan kubokunun sahibi "Xəzər-Lənkəran" futbol klubu bu yay Braziliyaya seleksionerlərini göndərməyəcək. Bu barədə çərşənbə günü Trend -a klubun mətbuat xidməti məlumat verib.
Trend -un arayışı: Son iki ildə "Xəzər-Lənkəran"ın transfer etdiyi legionerlərin əksəriyyəti Braziliyadan olub. Bu məqsədlə hər il transfer dövründə klubun seleksiyaçı-məşqçiləri Braziliyaya səfər ediblər. "Xəzər-Lənkəran"ın seleksionerlərinin Braziliyaya sonuncu səfəri bu ilin qışında olub.
Klubun mətbuat xidmətinin verdiyi məlumata görə, transfer siyahısında legioner futbolçular üstünlük təşkil edir. Heyətə cəlb olunacaq yeni oyunçuların adları dörd-beş gündən sonra açıqlanacaq.
"Xəzər-Lənkəran" növbəti futbol mövsümünə və UEFA kubokuna Avstriyada hazırlaşacaq. İyunun 24-dən iyulun 10-dək nəzərdə tutulan hazırlıq dövründə dörd yoxlama oyunu keçiriləcək.
İki dəfə Azərbaycan kubokunu qazanmış klubun baş məşqçisi Ağasəlim Mircavadovdur.
Məqalə müəllifi ilə əlaqə ünvanı: [email protected]