Azərbaycan, Bakı, 10 iyun / Trend , müxbir K.Zərbalıyeva/ Bakı şəhər Prokurorluğunun İstintaq İdarəsinin sabiq müstəntiqinə hökm oxunub. Korrupsiyada ittiham olunan Mahir Nağıyevə 5 il azadlıqdan məhrumetmə cəzası verilib. Məhkəmənin hökmü ilə Nağıyevə 1 il prokurorluq orqanlarında işləmək də qadağan olunub.
Vəkil Vüqar Xasayev hökümdən apellyasiya şikayəti verəcəklərini deyib.
Rüşvət alma və vəzifə səlahiyyətlərini aşmaqda ittiham olunan Bakı şəhər Prokurorluğunun İstintaq İdarəsinin sabiq müstəntiqi Nağıyev barəsində ötən il oktyabrın 30-da Nəsimi rayon məhkəməsinin qərarı ilə 3 ay müddətinə həbs qətimkan tədbiri seçilib.
Nağıyev baş prokurorun 2 iyul tarixli əmri ilə xüsusi rütbədən məhrum edilməklə prokurorluq orqanlarından xaric edilib.
Baş prokuror yanında Korrupsiyaya Qarşı Mübarizə İdarəsində Nağıyev barəsində aparılan cinayət işinin istintaqı zamanı müəyyən edilib ki, o, Bakı şəhər Prokurorluğunun İstintaq İdarəsində mühüm işlər üzrə müstəntiq vəzifəsində işləyərkən Baba Mahmudzadə və Ehtiram Əhmədovun həbs olunmaması üçün onlardan rüşvət alıb.
Nağıyev həmin cinayət işi üzrə axtarışda olmuş Nataliya Sinisınanın həyat yoldaşı Anatoli Sinisının adına Bakı şəhərinin Yasamal rayonunda, "Qanlı göl" ərazisinin şərq hissəsində olan 0,12 hektar bağ sahəsini rüşvət şəklində ələ keçirib.
Keçmiş müstəntiq barəsində Korrupsiyaya Qarşı Mübarizə İdarəsində Cinayət Məcəlləsinin təkrar rüşvət alma (311.3.2), vəzifə səlahiyyətlərini aşma (309.1) və vəzifə səlahiyyətlərindən sui-istifadə (308) maddələri ilə cinayət işi başlanmışdı.
Müəlliflə əlaqə saxlamaq üçün elektron ünvan - [email protected]