Azərbaycan, Bakı, 24 iyun/ Trend , müxbir E.Babayev/ Bakının Nəsimi rayon məhkəməsində bu gün "Azadlıq" qəzetinin jurnalisti Aqil Xəlilin bıçaqlanması üzrə cinayət işi üzrə məhkəmə iclası keçirilib.
Trend -un arayışı: "Azadlıq" qəzetinin müxbiri Xəlil bu il martın 13-də Ayna Sultanova küçəsi 523-ci məhəllədə yerləşən binalardan birinin yaxınlığında naməlum şəxslər tərəfindən bıçaqlanıb.
Hadisə baş verən gündən Xəlil hadisənin əvvəllər "Zeytun bağı"adlanan sahədə baş vermiş insidentlə və jurnalist fəaliyyəti ilə bağlı olması, iki nəfər şəxs tərəfindən izlənildiyini bildirib.
Baş Prokurorluğun yaydığı məlumatda isə jurnalistin qeyri-ənənəvi cinsi orentasiyaya malik şəxslər tərəfindən bıçaqlandığı bəyan edilib.
Belə ki, Xəlilin əvvəllər tanıdığı və onunla intim əlaqədə olmuş Serqey Strekalin tərəfindən bıçaqlandığının istintaqla sübuta yetirildiyi qeyd olunub.
Strekalin Cinayət Məcəlləsinin qəsdən sağlamlığa az ağır xəsarət yetirmə (127.1) və satış məqsədi olmadan qanunsuz olaraq narkotik vasitələri əldə etmə və saxlama (234.1) maddələri ilə təqsirli bilinərək həbs olunub.
Jurnalistin "Zeytun bağı" adlanan ərazidə döyülməsi faktı ilə bağlı başlanmış cinayət işinə isə xitam verilib.
Baş Prokurorluq Xəlilin mayın 7-də metroda ona sui-qəsd edilməsi və oğurlanmasına cəhd edilməsi ilə bağlı açıqladığı məlumatların da sübuta yetirilmədiyini bildirib. İstintaq zamanı Xəlilə, onun ailə üzvlərinə mənəvi və fiziki təzyiqlər göstərilməsi, jurnalistə hər hansı işgəncə verilməsi barədə məlumatlar da Baş Prokurorluq tərəfindən təkzib olunub.
Məhkəmə iclasında zərərçəkən Xəlil iştirak etmədiyindən, dövlət ittihamçısı Eldar Həmzəyev və təqsirləndirilənin vəkili Akif Məlikov məhkəmə qarşısında Xəlilin prosesdə məcburi iştirakının təmin edilməsi barədə qərar çıxarılmasını istəyiblər.
Xəlilin vəkili Elçin Sadıqov isə zərərçəkənin prosesdə iştirak etməyəcəyini deyib. Səbəb kimi qeyd edib ki, Xəlili Strekalin bıçaqlamayıb.
Məhkəmə iyulun 1-də Xəlilin iştirakının təmin edilməsi şərti ilə növbəti iclasın keçirilməsi barədə qərar çıxarıb.
Məqalə müəllifi ilə əlaqə ünvanı: [email protected]