Azərbaycan, Bakı, 16 iyul/ Trend , müxbir E.Babayev/ Azərbaycanın Mətbuat Şurası Daxili İşlər Nazirliyi ilə prezident seçkisiylə bağlı keçiriləcək aksiyalarda jurnalistlərin təhlükəsizliyinin artırılması məqsədilə birgə layihələr həyata keçirir.
"Bizim birgə layihəmiz var və bu layihə nəticəsində əksər redaksiyalara üzərində "press" sözləri yazılan göy rəngli xüsusi gödəkçələr paylanıb", çərşənbə günü Trend -a Mətbuat Şurasının sədri Əflatun Amaşov bildirib.
Azərbaycanda prezident seçkisinin oktyabrın ortalarında keçirilməsi planlaşdırılır.
Amaşov bildirib ki, indiyə qədər 250-ə yaxın belə gödəkçə redaksiyalara paylanılıb. "Mətbuat Şurasında bu gödəkçələrdən var və digər redaksiyalar da bu gödəkçələri əldə edə bilərlər", - deyən Amaşov vurğulayıb ki, aksiyalarda jurnalistlərin təhlükəsizliyini təmin etmək üçün hazırda başqa variant tapmağa ehtiyac yoxdur. "Aksiyalar zamanı xüsusi gödəkçələrdə olan jurnalistlərin toxunulmazlığı təmin olunur. Jurnalistlərin informasiya alması, eləcə də təhlükəsiz şəkildə aksiyanı işıqlandırması işinə xüsusi monitorinq qrupu nəzarət edəcək. Biz hesab edirik ki, DİN ilə birgə həyata keçirdiyimiz bu layihənin böyük əhəmiyyəti olub və xüsusilə icazəsiz aksiyalarda jurnalistlərin hansısa formada təzyiqə məruz qalması halları aradan qalxıb", - deyə o vurğulayıb.
Azərbaycanın Mətbuat Şurası 2003-cü il martın 15-də jurnalistlərin I qurultayında yaradılıb. Şura yaradılandan quruma Əflatun Amaşov sədrlik edir.
Məqalə müəllifi ilə əlaqə ünvanı: [email protected]
