Azərbaycan, Bakı,16 iyul / Trend , müxbir A.Əliyev/ Azərbaycanda itkin düşmüş şəxslərlə bağlı milli qanunvericilik bazası hazırlanır.
Trend -un məlumatına görə, bu məsələ Beynəlxalq Qızıl Xaç Komitəsinin Azərbaycandakı nümayəndəliyinin rəhbəri Martin Amaşerin Milli Məclisin sədr müavini Bahar Muradova ilə çərşənbə günü keçirilən görüşündə müzakirə olunub. Amaşer bildirib ki, itkin düşmüş şəxslərlə bağlı yeni qanun layihəsinin hazırlanması həm də mövcud vəziyyətdən irəli gəlir. Bu Qanunun qəbulu itkin düşmüş şəxslərin hüquqlarının qorunmasına xidmət edəcək. Amaşer MDB ölkələri parlament assambleyasında artıq belə bir sənədin hazırlandığını və noyabr ayında qəbul olunacağını deyib və təklif edib ki, məsələ ilə bağlı geniş Dəyirmi Masa keçirilsin.
Milli Məclisin sədr müavini sənədin Milli Məclisin yaz sessiyasında müzakirəyə çıxarıla biləcəyini istisna etməyib.
Əsir və itkin düşmüş, girov götürülmüş vətəndaşlarla iş üzrə Dövlət Komissiyasının məlumatına görə, 2008 -ci il iyunun 1 - nə, itkin düşmüş və girov götürülmüş şəxslərin sayı 4264 nəfər olub. Onlardan 3439-ü hərbçi, 817-si mülki şəxslərdir (8 nəfərin hərbçi və ya mülki olduğu məlum deyil).
Məqalə müəllifi ilə əlaqə ünvanı: [email protected]