Azərbaycan, Bakı, 17 iyul/ Trend , müxbir E.Babayev/ Azərbaycanın Ədliyyə Nazirliyi Mətbuat Şurasının Nizamnaməsinə dəyişikliyi təsdiq edib. Bu barədə cümə axşamı Trend -a Şuranın sədri Əflatun Amaşov məlumat verib.
Mətbuat Şurasının (MŞ) Nizamnaməsinə dəyişikliklər olunması ilk dəfə ölkə jurnalistlərinin 2006-cı il dekabrın 23-də keçirilmiş IV qurultayında müzakirə edilmişdi. Bu il iyun ayının 20-də ölkə jurnalistlərinin V qurultayında isə Nizamanməyə dəyişikliklər səs çoxluğu ilə qəbul edilib.
Sənədin yeni variantında Şuranın İdarə Heyətinin səlahiyyət müddəti 2 ildən 4 ilədək artırılıb. Həmçinin MŞ üzvlərinin qurumun mərkəzi orqanlarında eyni vəzifəyə dalbadal iki müddətdən artıq seçilə bilməməsini nəzərdə tutan məhdudiyyət aradan qaldırılıb.
Azərbaycanın Mətbuat Şurası 2003-cü il martın 15-də jurnalistlərin I qurultayında yaradılıb. Şura yaradılandan quruma Amaşov sədrlik edir.
Məqalə müəllifi ilə əlaqə ünvanı: [email protected]