Azərbaycan, Bakı, 23 iyul / Trend , müxbir K.Zərbalıyeva/ Vakant dövlət qulluğu vəzifələrinin tutulması məqsədi ilə keçirilən müsahibə başa çatıb.
Prezident yanında Dövlət Qulluğu Məsələləri üzrə Komissiyadan Trend-News-a verilən məlumata görə, müsahibədə iştirak etmiş 130 namizəddən 54-ü müvafiq vəzifələrə təyin olunmaq üçün dövlət orqanlarının rəhbərinə təqdim ediliblər.
Dövlət Komissiyası bu il 5 və 18 iyun tarixlərində 13 dövlət orqanında inzibati vəzifələrin altıncı - doqquzuncu təsnifatlarına uyğun olan 168 vakant dövlət qulluğu vəzifəsinin tutulması üçün müsahibə elan edib.
Müsahibəyə ən çox vakant vəzifə çıxaran dövlət qurumu - Əmək və Əhalinin Sosial Müdafiəsi Nazirliyi olub. Belə ki, 168 vakant dövlət qulluğu vəzifəsindən 83-ü bu nazirliyin payına düşüb.
Müsahibədə ən çox namizəd keçən dövlət qurumu İqtisadi İnkişaf Nazirliyi olub. Belə ki, müsahibədə iştirak etmiş 130 nəfərdən 14-ü bu nazirlikdəki vakant yerlər üçün təklif olunub.
Müsahibəyə 1 vakant vəzifə çıxarmış Sənaye və Energetika Nazirliyinə heç bir namizəd qeydə alınmayıb.
Azərbaycanda dövlət qulluğunun 6-9-cu təsnifatları üzrə dövlət qulluğuna qəbulu Prezident yanında Dövlət Qulluğu Məsələləri üzrə Dövlət Komissiyası müsabiqə və müsahibə yolu ilə həyata keçirir.
Müəlliflə əlaqə saxlamaq üçün elektron ünvan - [email protected]