Azərbaycan, Bakı,25 iyul / Trend , müxbir K.Zərbalıyeva/ Azərbaycandan səkkiz jurnalist Avropa İnsan Haqları Məhkəməsinə şikayət göndərib.
Media Hüquq İnstitutundan cümə günü Trend -a verilən məlumata görə, ölkədaxili məhkəmələrin qərarlarından narazı qalan bir qrup aparıçı müstəqil ve müxalifyönümlü KİV-lərin jurnalistləri Azərbaycan qanunvericiliyində, eləcə də Avropa Konvensiyasında nəzərdə tutulmuş hüquq və azadlıqlarına müdaxilə olunduğunu iddia edirlər.
Rauf Abbasov, Azər Abbasov, Etibar Ağayev, Elşad Məmmədli, Zabil Nəcizadə, Qənimət Zahidov, Şahvələd Namazov və Mehman Əliyev 12 iyun 2007-ci il tarixində Sabir bağında mediaya basqılara etiraz olaraq aksiya keçirməyə cəhd etsələr də, paytaxtın Səbail rayon Polis İdarəsi əməkdaşlarının fiziki basqıları ilə üzləşiblər. 4 jurnalist zor tətbiq olunmaqla həbs edilib. Jurnalistlər məhkəməyə müraciət edərək polisin piketə müdaxiləsini qanunsuz hesab edən, jurnalistlərə zor tətbiq edən polis əməkdaşlarına cinayət işi başlanmasını, habelə cavabdehin hüquqları pozulan jurnalistlərə 10.000 AZN təzminat ödəməsini nəzərdə tutan qətnamə qəbul etməsini istəmişdilər. Səbail rayon məhkəməsi 20 iyul 2007-cı il tarixində iddianı icraata götürməkdən imtina edib. Bakı Apellyasiya Məhkəməsi və Ali Məhkəmə jurnalistlərin şikayətini rədd edib.
Avropa Məhkəməsinə göndərilən şikayətdə qeyd olunur ki, ölkə məhkəmələri piket keçirmələrinə imkan verilməyən jurnalistlərin iddiası üzrə qərarlar verərkən onların Avropa Konvensiyasında təsbit olunmuş ədalətli məhkəmə araşdırması (maddə 6), yığıncaqlar və birləşmək (maddə 11), işgəncələrin qadağan olunması (maddə 3), səmərəli hüquqi müdafiə vasitələri (maddə 13) hüquq və azadlıqlarına müdaxilə ediblər. Avropa Məhkəməsindən ərizəçilərin hüquqlarının pozulmasının tanınması, onların işlə bağlı çəkdiyi xərclərin və zərərlərin əvəzinin ödənilməsinin təmin olunması xahiş edilir.
Avropa Məhkəməsi Azərbaycana qarşı bu vaxtadək 13 qərar çıxarıb. Azərbaycanın Avropa Məhkəməsindəki hakimi Xanlar Hacıyev bildirib ki, Azərbaycandan Avropa Məhkəməsinə göndərilən şikayətlərin sayı artır. Hazırda Avropa Məhkəməsində Konvensiyanın 6-cı (ədalətli məhkəmə araşdırması hüququ), 11-ci (yığıncaqlar və birləşmək azadlığı hüququ) maddələri ilə bağlı artıq bir neçə qərar, 3-cü maddə (işgəncələrin qadağan olunması) ilə bağlı iki qərar var və 30-dan artıq iş dövlətlə kommunikasiya olunub.
Müəlliflə əlaqə saxlamaq üçün elektron ünvan - [email protected]
