Azərbaycan, Bakı, 12 sentyabr / Trend , C.Babayeva/ Gürcüstandakı son hadisələrlə əlaqədar ölkədəki azərbaycandilli məktəblərin dərsliklərlə təminatında gecikmə yarana bilər. "Gürcüstandakı son hadisələrlə əlaqədar nazirliyin nümayəndələrinin sentyabrın 12-nə planlaşdırılan səfəri təxirə salınıb. Gürcüstan Təhsil Nazirliyinin nümayəndələrinin də sentyabrın 9-na təyin olunmuş səfəri baş tutmayıb", - deyə Təhsil Nazirliyinin Dərslik və nəşriyyat şöbəsinin müdiri Faiq Şahbazlı cümə günü Trend -a bildirib.
Hər il yeni dərs ilinin əvvəlində Azərbaycan Təhsil Nazirliyi Gürcüstandakı azərbaycandilli məktəblərə dərsliklər göndərir. Gürcüstanın Təhsil Nazirliyi Azərbaycanın Qax-Balakən zonasındakı məktəblərə gürcü dilində kitablar təqdim edir.
Keçən il Gürcüstanın azərbaycandilli məktəblərinə 40 mindən çox dərsliyin göndərildiyini qeyd edən Şahbazlı bu il 20 min nüsxədən çox dərslik təqdim olunacağını bildirib. "Dərsliklər əsasən 4, 5, 6, və 10-cu siniflər üçün azərbaycan dili, ədəbiyyat, riyaziyyat və başqa fənlər üzrə təqdim olunur. Yalnız tarix və coğrafiya dərslikləri göndərilmir. Çünki iki dövlət arasında ortaq tarix və coğrafiya dərsliklərinin hazırlanmasına dair razılaşma əldə olunub", -deyə şöbə müdiri bildirib.
Məqalə müəllifi ilə əlaqə - [email protected]