Azərbaycan, Bakı, 22 oktyabr / Trend , müxbir K.Zərbalıyeva/ "Azadlıq" qəzetinin həbsdə olan jurnalisti Mirzə Sakitin cəza çəkdiyi müəssisədə döyülməsi təsdiq olunmayıb.
Penitensiar Xidmətin İctimaiyyətlə əlqələr şöbəsinin rəisi Mehman Sadıqov çərşənbə günü Trend -a bildirib ki, Sakit çərşənbə axşamı Ədliyyə Nazirliyinin Tibb Baş İdarəsinin həkimləri tərəfindən müayinə olunub. Onun bədənində döyülməni təsdiq edən heç bir xəsarət aşkarlanmayıb. Sadıqov bildirib ki, müayinə zamanı jurnalistin səhhəti ilə bağlı problem müəyyən olunmayıb.
Dünən bir qrup hüquq müdafiəçisi ilə ədliyyə naziri Fikrət Məmmədovun görüşündə nazir Sakitin cəza çəkdiyi müəssisənin dəyişdiriləcəyini, onun müayinədən keçirilməsi barədə tapşırıq verdiyini deyib.
Nazir ehtiyac olarsa Sakitin hospitala, ya da başqa cəzaçəkmə müəssisəsinə göndəriləcəyini də bildirib.
Sakitin həyat yoldaşı Rəna Zahidova oktyabrın 20-də keçirdiyi mətbuat konfransında 14 saylı cəzaçəkmə müəssisəsində jurnalistin döyüldüyünü deyib.
Oktyabrın 20-də müəssisə əməkdaşları Sakitin başını qırxmaq istəyiblər. Sakit həmin gün ad günü olduğundan başının qırxılmamasını xahiş edib. Lakin onun cəza çəkdiyi 14 saylı müəssisənin bir qrup əməkdaşı onu döyərək başını qırxıb.
Sadıqov bildirib ki, daxili intizam qaydalarına uyğun olaraq, Sakitin başını qırxmaq istəyiblər. Buna etiraz etdiyindən müəssisə əməkdaşları Sakitin başını məcburi qırxıb.
Şöbə rəisi Sakitin müəssisəsinin dəyişdirilməsi ilə bağlı məsələyə baxıldığını bildirib.
"Azadlıq" qəzetinin əməkdaşı Sakit 2006-cı ildə narkotik maddə saxlama ittihamı ilə 3 il azadlıqdan məhrum edilib. Jurnalist isə həbsinin peşə fəaliyyəti ilə bağlı olduğunu iddia edir. Beynəlxalq təşkilatlar onun və həbsdə olan digər iki jurnalistin azadlığa buraxılmasını tələb edirlər
Müəlliflə əlaqə saxlamaq üçün elektron ünvan- [email protected]
