Azərbaycan, Bakı, 10 noyabr/ Trend , müxbir C.Babayeva/ Gürcüstanda yaşayan azərbaycanlılar milli azlıqlar probleminin həllində öz yollarını təklif edirlər.
"Milli azlıqların, o cümlədən də Gürcüstan azərbaycanlılarının problemlərinin həlli üçün dövlət qurumu yaradılmalıdır. Bu qurum milli azlıqların problemlərinin həlli proqramını mərhələli şəkildə realizə etməlidir. Qurum yaradılmadan Gürcüstanın Avropa Şurası qarşısında milli azlıqların hüquqlarının müdafiəsi sahəsində götürdüyü öhdəliklərin yerinə yetirilməsi qeyri - mümkündür", - Gürcüstan azərbaycanlılarının "Qeyrət" xalq hərəkatının sədri Əlibala Əsgərov bazar ertəsi Tbilisidən telefonla Trend - a bildirib.
Dekabrda Avropa Şurasının Millli Azlıqlar Konvensiyası Komitəsinin nümayəndələri Tbilisiyə gələcəklər. Təşkilatın nümayəndələri dövlətin bu sahədə götürüdyü öhdəlikləri nə dərəcədə yerinə yetirməsinin monitorinqini aparacaqlar.
2005 - ci ildə Gürcüstan parlamenti Avropanın "Milli azlıqların müdafiəsi haqqında" çərçivə Konvensiyasını təsdiq edib və Gürcüstan hakimiyyəti inteqrasiya sahəsində dövlət siyasətinin hazırlanmasına başlayıb.
Əsgərovun rəyinə görə, Gürcüstan öz öhdəliklərini yerinə yetirmir. "Gürcüstanın milli azlıqları hələ də təhsil, məşğulluq, torpaq sahəsinin alınması sahəsində problemlərlə qarşılaşırlar. "Hökumət tərəfindən milli azlıqların problemlərinin həlli üzrə addımlar atılmır, hüquqi baza da yoxdur", - Əsgərov bildirib.
Onun sözlərinə görə, milli azlıqların problemlərinin həlli məqsədilə qəbul edilən bütün qanunlar çox çətinləşdirilib. "Gürcüstan hakimiyyətinin milli azlıqlara qarşı apardığı inteqrasiya siyasəti tez - tez onların assimilyasına gətirir", - hərəkatın sədri bildirib.
Gürcüstanın Azərbaycanlı Ziyalıları Birliyinin sədri Novruz Bayramovun rəyinə görə, milli azlıqlar problemi tədricən öz həllini tapır. "Əsasən, kadr problemləri qalır ki, onların da həlli dövlət siyasətindən asılıdır", - Bayramov bazar ertəsi Tbilisidən telefonla Trend - a bildirib.
Qeyri - rəsmi məlumatlara görə, Gürcüstanda, əsasən, Kvemo-Kartli rayonunda (Borçalı) məskunlaşmış təxminən 500 min azərbaycanlı yaşayır.
Müəlliflə əlaqə saxlamaq üçün elektron ünvan: [email protected]
