Azərbaycan, Bakı, 03 dekabr / Trend , müxbir K.Zərbalıyeva/ Azərbaycanda vəkilliyə qəbul üçün sənəd qəbulunun müddəti dekabrın 31-dək uzadılıb.
Vəkillər Kollegiyasının sədr müavini Fərhad Nəcəfov çərşənbə günü Trend -a bildirib ki, sənəd qəbulu başlanan gündən - iyulun 15-dən indiyədək vəkil olmaq üçün 377 nəfər sənəd verib.
Nəcəfov deyib ki, sənəd verənlərin sayı az olduğundan və ötən imtahandan keçə bilməyən namizədlər də müsabiqədə iştirak etmək üçün müraciət etdiyindən müddət uzadılıb.
Sədr müavininin sözlərinə görə, sənəd verənlərin əksəriyyəti Bakıda yaşayanlardır. Respublikanın cənubunda yerləşən Lerik və Yardımlı rayonlarından vəkil olmaq üçün sənəd verən olmayıb.
Müsabiqə 2 mərhələdən ibarətdir. Birinci mərhələdə namizədlərlə test imtahanı keçirilir və onlar hüququn müxtəlif sahələrinə, məntiqə aid sualları cavablandırırlar. Bu mərhələdə 50 və daha çox bal toplamış namizəd müsahibə mərhələsində iştirak etmək imkanı qazanır.
Vəkillər Kollegiyasına üzvülük üçün sonuncu müsabiqə ötən il keçirilib və müvəffəqiyyət qazanmış 241 namizəd vəkilliyə qəbul olunub.
Bu müsabiqədən sonra Azərbaycanda vəkillərin sayı 800-ə çatdırılıb.
Azərbaycan vəkillərin sayına görə Avropa ölkələri sırasında sonuncu yerlərdə durur.
Məqalə müəllifi ilə əlaqə ünvanı:[email protected]