Azərbaycan, Bakı, 31 avqust / Trend , muxbir K.Zərbalıyeva /
Azərbaycan Ədliyyə Nazirliyi qeyri-hökumət təşkilatı tərəfindən məhkəməyə verilib. Trend -un məlumatına görə, bazar ertəsi Seçkilərin Monitorinqi və Demokratiyanın Tədrisi Mərkəzinin (SMDT) Ədliyyə Nazirliyinə qarşı iddiası üzrə məhkəmə baxışı başlayıb.
Mərkəzin qeyri-hökumət təşkilatının dövlət qeydiyyatına alınmasından imtinanın qanunsuz sayılması və birləşmək hüququnun pozulmasına dair qaldırdığı iddia tələbi ilə bağlı keçirilən prosesdə tərəflərin sübutları araşdırılıb, mövqeləri müzakirə olunub.
SMDT 26 yanvar 2009-cu ildə sənədləri qeydiyyat üçün Ədliyyə Nazirliyinə göndərib. Ancaq aprelin 29-da Ədliyyə Nazirliyinin Qeydiyyat və Notariat Baş İdarəsi sənədləri geri qaytarıb. Nazirliyin məktubunda SMDT-nin təqdim etdiyi sənədlər arasında qurumun yaradılması və Nizamnaməsinin təsdiq edilməsi haqqında qərarın təqdim olunmadığı və qurumun Nizamnaməsində "Qeyri-hökumət təşkilatları (ictimai birliklər və fondlar) haqqında" qanunun adının düzgün qeyd olunmaması göstərilib.
SMDT-nin təsisçiləri Ədliyyə Nazirliyinin hərəkətini hüquqa zidd davranış kimi qiymətləndirərək, nazirliyə qarşı Yasamal rayon məhkəməsinə iddia ilə müraciət edib.
SMDT təsisçisi Bəşir Süleymanlı Ədliyyə Nazirliyinin müvafiq qərarını Konstitusiyanın 58-ci maddəsinin (birləşmək hüququ) və İnsan hüquqlarının və əsas insan azadlıqlarının müdafiəsi haqqında Konvensiyanın 11-ci maddəsinin (yığıncaqlar və birləşmək azadlığı) pozuntusu kimi qiymətləndirib.
Məhkəmə sentyabrın 2-də yekun qərarını elan edəcək.
Məqalə müəllifi ilə əlaqə ünvanı:[email protected]
