Azərbaycan, Bakı, 22 oktyabr / Trend , müxbir H.Bağırov/
"Zamin Bank "ın Mərkəz filialının sabiq direktorunun məhkəmə istintaqı yekunlaşıb.
Trend -un məlumatına görə, Ağır Cinayətlərə Dair İşlər üzrə Məhkəmədə cümə axşamı keçirilən iclasda çıxış edən dövlət ittihamçısı sabiq direktor Vidadi Xudiyevin 10 il müddətinə azadlıqdan məhrum edilməsini xahiş edib.
Xudiyev Cinayət Məcəlləsinin mənimsəmə və ya israf etmə (179.1, 179.3.2), vəzifə səlahiyyətlərindən sui-istifadə (308.1) maddələri ilə ittiham olunur.
Bakı şəhər sakini, "Zamin Bank"ın Mərkəz filialının direktoru olmuş Xudiyev vəzifə səlahiyyətlərindən sui-istifadə edərək bank sənədlərini saxtalaşdırmaqda ittiham olunur. Onun Bakı şəhər sakinləri Orxan Şirinov, Sərdar Qəribov və digər şəxslərin etibarından istifadə edərək, onların pul vəsaitlərini mənimsədiyi müəyyən edilib. DİN Baş Mütəşəkkil Cinayətkarlıqla Mübarizə İdarəsi əməkdaşlarının keçirdiyi əməliyyat tədbirləri nəticəsində Xudiyev tutulub.
Məqalə müəllifi ilə əlaqə ünvanı: [email protected]
