Azərbaycan, Bakı, 7 iyun /Trend, müxbir T.Hacıyev/
Sumqayıt şəhər Dövlət Rəsm Qalereyasında I şəhər Ekoloji Forumu çərçivəsində ekologiyanın qorunması ilə bağlı məktəblilərin fikirlərini və təsəvvürlərini əks etdirən "Təbiət bizim sərvətimizdir!" adlı rəsm-sərgi müsabiqəsi keçirilib.
Sumqayıt şəhər İcra Hakimiyyəti başçısının müavini Ramiz Həsənov bugünkü tədbirin həyata keçirilməsində fəal iştirakına görə ARDNŞ-nin və "Azərikimya" İstehsalat Birliyinin rəhbərliyinə təşəkkür edib, "Təbiət bizim sərvətimizdir!" devizi altında keçirilən rəsm-sərgi müsabiqəsinin məhz Dövlət Neft Şirkəti və Birliyin himayədarlığı ilə keçirilməsini yüksək qiymətləndirib.
Həsənov öz çıxışında qeyd edib ki, son dövrlərdə Sumqayıtda yaşıllıq zonaları xeyli artıb, 10-dan artıq yeni park və xiyaban salınıb, 23 mindən artıq ağac əkilib ki, onların da böyük bir hissəsi Sumqayıt kimyaçılarının payına düşür. O qeyd edib ki, böyüklərlə, valideynlərlə bərabər Sumqayıtın ekoloji mühitinin yaxşılaşdırılması və şəhərin yaşıllaşdırılması işində məktəblilər də fəal iştirak etməklə yanaşı, onlar həm də ekoloji maarifləndirmə və təbliğat sahəsində də mühüm iş görərək, ekologiya ilə bağlı öz fikir və təsəvvürlərini şəhər əhalisinə bugünkü sərgi-müsabiqəyə təqdim etdikləri bir-birindən maraqlı, süjet və məzmun baxımından daha təsirli olan rəsm və karikaturalar və inşa yazılarla daha qabarıq çatdırmağa çalışıblar.
Sumqayıt şəhər Təhsil şöbəsinin metodiki kabinetinin müdiri, sərgi-müsabiqənin təşkilatçılarından biri olan Sabir Məmmədov bugünkü tədbirdə şəhərin bütün məktəblərindən iki yaş qrupunda - 6-13 və 14-17 yaşlar arasında yüzlərlə şagirdin iştirak etdiyini bildirib. O qeyd edib ki, üç nominasiya üzrə keçirilən sərgi-müsabiqənin iştirakçıları öz doğma şəhərlərinin ekoloji təmizliyinə böyük diqqət və maraq göstərdikləri üçün onların arasından mütləq qalibləri müəyyən etmək çətinlik yaratdığından həm birinci, həm də ikinci və üçüncü yerlərə bir nəfər deyil, bir neçə məktəbli layiq görülüblər.
"Təbiət bizim sərvətimizdir! Ekologiya və ətraf mühitin qorunması" mövzusu üzrə birinci nominasiyada olduğu kimi, digər nominasiyalarda - "Tullantıların ikinci həyatı" və inşa müsabiqələrində də birinci yerə dörd nəfər, ikinci yerə altı, üçüncü yerə isə səkkiz nəfər iştirakçı layiq görülüb. Rəsm müsabiqəsində birinci yerləri Orxan Rəcəbov, Qalib Şiriyev, Sevda Cavadova və Zülfiyyə Əmirova, ikinji nominasiya üzrə Nəzrin İsmayılova, Nərmin Ömərli, Rəvan Məmmədəliyev, Köçəri Köçərli, üçüncü nominasiya üzrə Aysel Əkbərova, Emil Quliyev, Humay Məmmədli və Nuça Korşiya tutublar.
ARDNŞ-nin vitse-prezidenti Soltan Əliyev tədbirdə çıxış edərək bildirib ki, Sumqayıtın gələcəyi olan bugünkü müsabiqə iştirakçıları həm özlərinin inşa yazıları, həm də bir-birindən maraqlı rəsm əsərləri ilə şəhərin ekologiyasının qorunması işinə öz gözəl töhfələrini veriblər.
Məhz buna görə də o, Sumqayıt şəhər Təhsil şöbəsinin təklifi nəzərə alınaraq, sərgidə nümayiş olunan bütün əsərlərin toplanılaraq xüsusi albom hazırlanacağını və həmin albomun nəfis şəkildə, həm də böyük tirajla nəşr olunmaqla bütün respublikada yayılacağını bildirib. Sərgi iştirakçıları ARDNŞ rəhbərliyinin bu təşəbbüsünü böyük razılıq və minnətdarlıqla qarşılayıblar.