Azərbaycan, Bakı, 29 iyul /Trend, müxbir K.Zərbalıyeva/
Avropa İnsan Hüquqları Məhkəməsi bu gün Azərbaycana qarşı daha bir iş üzrə - Cəfərli və başqalarının Azərbaycana qarşı işi üzrə qərarını açıqlayıb.
Hüquq Maarifçiliyi Cəmiyyətindən Trend-ə verilən məlumata görə, ərizəçilər - Cəfərli Səfərəli, Validə Bağırzadə və Elçin Cəfərov qanuni qüvvəyə minmiş 9 iyul 2002-ci il tarixli məhkəmə qərarının icra edilməməsi ilə onların Konvensiyanın 6-cı maddəsinin 1-ci bəndi və 13-cü maddəsi və Konvensiyanın 1 saylı Protokolunun 1-ci maddəsi ilə təminat verilən ədalətli məhkəmə araşdırması və mülkiyyət hüquqlarının pozulduğunu iddia ediblər.
İşə baxan Avropa İnsan Hüquqları Məhkəməsi şikayəti Konvensiyanın 6-cı maddəsinin 1-ci bəndi və 13-cü maddəsi və Konvensiyanın 1 saylı Protokolunun 1-ci maddəsi (9 iyul 2002-ci il tarixli məhkəmə qərarının icra edilməməsi) üzrə qəbuledilən, qalan hissələr üzrə isə şikayəti qəbuledilməyən elan edib.
Avropa Məhkəməsi, həmçinin ərizəçilərin Konvensiyanın 6-cı maddəsinin 1-ci bəndi (ədalətli məhkəmə araşdırması) və Konvensiyanın 1 saylı Protokolunun 1-ci maddəsi (mülkiyyət hüququ) ilə təminat verilən hüquqlarının pozulduğu barədə qərar qəbul edib.
Məhkəmə şikayətin əlavə olaraq Konvensiyanın 13-cü maddəsi üzrə araşdırılmasına ehtiyac olmadığını bildirib. Avropa Məhkəməsi həmçinin qeyd edib ki, ərizəçilər Məhkəmə qaydalarının 60-cı bəndinə uyğun olaraq əvəzin ədalətli ödənilməsi barədə heç bir iddia irəli sürməyiblər və buna görə də Məhkəmə hesab edir ki, bununla bağlı onlara hər hansı məbləğin ödənilməsinə ehtiyac yoxdur.