Azərbaycanda orta ixtisas təhsili müəssisələrinə qəbul imtahanının nəticələri açıqlanıb

Аzərbaycan, Bakı, 31 avqust /Trend, müxbir М.Əliyev/

Çərşənbə axşamı Azərbaycanda ümumi orta təhsli bazasında (9 illik) orta ixtisas təhsili müəssisələrinə qəbul imtahanının nəticələri açıqlanıb. Bu barədə Tələbə Qəbulu üzrə Dövlət Komissiyasından verilən məlumatda deyilir.

Avqustun 29-da keçirilmiş imtahanlarda 30 261 abituriyent iştirak edib ki, onlardan 8515-i orta ixtisas təhsili müəssisələrinə qəbul olub.

Abituriyentlərdən 40 nəfəri imtahan qaydalarına zidd hərəkətlərə yol verdiklərinə görə, imtahandan xaric olunaraq nəticələri ləğv edilib.

Qəbul olanlar sentyabrın 2-dən 13-dək (şənbə və bazar günləri istisna olmaqla) sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər. Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri orta ixtisas məktəbinə göndərilməyəcək.