Azərbaycan, Bakı, 2 sentyabr /Trend, müxbir H.Bağırov/
Azərbaycanda uşaq alverində ittiham olunan şəxslərin apelyasiya şikayəti təmin edilməyib.
Trend-in məlumatına görə, bu gün Bakı Apelyasiya Məhkəməsində İlham Trihudənin, Elman Dadixinin və Zülfiyyə Hüseynovanın Ağır Cinayətlərə Dair İşlər üzrə Məhkəmənin hökmündən verdikləri apelyasiya şikayəti üzrə qərar elan edilib.
Qərara görə, təqsirləndirilən şəxslərin apelyasiya şikayəti təmin edilməyib və Ağır Cinayətlərə Dair İşlər üzrə Məhkəmənin çıxardığı hökm qüvvədə saxlanılıb.
Ağır Cinayətlərə Dair İşlər üzrə Məhkəmənin hökmü ilə İlham Trihudə 8 il 6 ay, Elman Dadixi və Zülfiyyə Hüseynova isə 8 il müddətinə azadlıqdan məhrum ediliblər.
Təqsirləndirilənlər 2009-cu il iyunun 6-da Daxili İşlər Nazirliyi Nəqliyyatda Baş Polis İdarəsi əməkdaşlarının keçirdikləri əməliyyat tədbirləri nəticəsində Bakı Dəmir Yolu Stansiyasının ərazisində Zülfiyyə Hüseynovanın 7 aylıq qızı Könülü 6 400 manata satarkən tutulublar.
