Azərbaycan, Bakı, 3 dekabr /Trend, müxbir K.Zərbalıyeva/
Bu ilin 11 ayında Bakıda Baş Dövlət Yol Polisi İdarəsinin Siqnal İdarəsi tərəfindən 261 yol hərəkət nişanları quraşdırılıb. BDYPİ-nin ictimaiyyətlə əlaqələr şöbəsinin rəhbəri Kamran Əliyev cümə günü Trend-ə bildirib ki, bu il ərzində Bakı şəhərində 5, respublikanın rayonlarında isə 3 işıqfor obyekti qoyulub.
Həmçinin Bakıda 256, respublikanın rayonlarında 501 yol nişanları quraşdırılıb.
İdarə rəsmisinin sözlərinə görə, küçə və yollarda Nəqliyyat Nazirliyi tərəfindən də yol hərəkət nişanları quraşdırılıb və yeni çəkilən yol və körpülər bütün yol hərəkət nişanları ilə təmin olunub.
Əliyevin sözlərinə görə, hansısa əraziyə yol hərəkət nişanları quraşdırılmazdan öncə nəqliyyat vasitələrinin və piyadaların hərəkəti ilə bağlı xronometraj aparılır.
"Hansı ərazidə hansı yol hərəkət nişanına ehtiyac olduğu öyrənilir. Bakı şəhərində yol hərəkət nişanları Nazirlər Kabinetinin Yol Hərəkətinin Təhlükəsizliyi Komissiyasının, rayonlarda isə icra hakimiyyəti orqanlarının qərarı ilə quraşdırılır", - BDYPİ rəsmisi deyib.
Onun sözlərinə görə, ərazidə yol hərəkət nişanları ayrı-ayrı şəxslərin istəyi ilə qoyulmur. "Hansısa ərazidə hərəkətin tənzimlənməsinə ehtiyac olduğu müəyyənləşərsə, həmin əraziyə Nazirlər Kabinetinin müvafiq komissiyasının nümayəndələri baxış keçirir və bundan sonra müvafiq qərar qəbul edilir", - şöbə rəisi vurğulayıb.
