Azərbaycan, Bakı, 19 sentyabr /Trend, müxbir M.Əliyev/
Azərbaycan Gənclər və İdman Nazirliyində sentyabrın 21-də Beynəlxalq Sülh Günü qeyd ediləcək. Trend-in məlumatına görə, bu barədə bazar ertəsi nazirliyin yaydığı məlumatda bildirilir.
Gənclər və İdman Nazirliyinin iclas zalına saat 15.00-da toplaşacaq gənclər "Sülh aylığı" çərçivəsində Beynəlxalq Sülh Gününü qeyd edəcəklər.
Bu münasibətlə "Gənclərin vətəndaşlıq tərbiyəsində sülh mədəniyyətinin və insan hüquqlarının təbliğinin rolu" mövzusunda konfrans keçiriləcək.
Tədbirdə tələbə-gənclər təşkilatlarının, gənclər təşkilatlarının və fəal gənclərin iştirakı nəzərdə tutulub.
Beynəlxalq Sülh Günü 1982-ci ildən keçirilir və bu gün dünya ölkələrində bir dəqiqəlik sükutla, BMT-nin Nyu-Yorkdakı qərargahında sülh zəngi çalınmaqla qeyd olunur.