"Azəriqaz"a daxil olan müraciətlərin çoxu qaz sayğaclarının koda düşməsi ilə bağlı olub

Azərbaycan, Bakı, 23 aprel /Trend, müxbir E.Mehdiyev/

2012-ci ilin birinci rübündə ARDNŞ-nin "Azəriqaz" İstehsalat Birliyinin 185 nömrəli "qaynar xətt"inə 3602 müraciət daxil olub.

Trend-in İB-nin rəsmi saytına istinadən verdiyi məlumata görə, zənglərin 97,5%-i (3514 zəng) Bakı şəhəri və Abşeron rayonunda yaşayan vətəndaşlar tərəfindən edilib. Müraciətlərin təqribən 63,2%-i qaz sayğaclarının koda düşməsi, 10,1%-i istifadə olunan qaza görə yaranmış borcun araşdırılması, 4,3%-i qazın təzyiqinin aşağı olması, 3,3%-i qaz xətlərindəki nasazlıq, qalan hissəsi isə müxtəlif məsələlərlə bağlı olub.

Cari ilin birinci rübündə ən çox müraciət (46,3%) havaların şaxtalı keçdiyi fevral ayına təsadüf edib. Müraciətlərin 66%-i (2387 zəng) yerli Qaz İstismar sahələrinə yönəldilib, qalan hissəsi isə "qaynar xətt"in dispetçerləri tərəfindən cavablandırılıb.

"Azəriqaz" İB-nin "qaynar xətt"inə edilən bütün müraciətlər qeydə alınaraq, Birliyin müvafiq struktur bölmələri tərəfindən araşdırılıb və problemlər öz həllini tapıb.