Azərbaycan, Bakı, 12 iyun /Trend/
Əmək və əhalinin sosial müdafiəsi nazirinin müavini İlqar Rəhimov "Sosial Xidmətlər Təşəbbüsü" İctimai Birliyinin direktoru Ramiz Behbudovu və Avropa Reabilitasiya Platformasının mütəxəssislərini qəbul edib.
Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən çərşənbə axşamı Trend-ə verilən məlumata görə, görüşdə nazirliyin və Beynəlxalq Əmək Təşkilatının maliyyə dəstəyi və texniki yardımı ilə əlillərin bərpa mərkəzlərinin fəaliyyətinin təkmilləşdirilməsi məqsədilə cari ilin may ayından başlanan yeni layihənin icrası ilə bağlı fikir mübadiləsi aparılıb.
Rəhimov "Sosial Xidmətlər Təşəbbüsü" İB tərəfindən icra olunan yeni layihənin bərpa mərkəzlərində göstərilən xidmətin əlilliyi olan şəxslərin sosial inteqrasiya ehtiyaclarına uyğunlaşdırılması, səmərəli və çoxşaxəli reabilitasiya üsullarının tətbiqi baxımından önəm kəsb etdiyini deyib, bu sahədə nazirliyin baxışları və prioritetləri barədə məlumat verib.
Bildirilib ki, icra olunacaq layihə qeyd olunan mərkəzlərin mövcud fəaliyyətinin genişləndirilməsinə, göstərilən xidmətlərin çeşidinin artırılması və keyfiyyətinin yaxşılaşdırılmasına şərait yaradacaq. Layihənin əsas məqsədi əlilliyi olan şəxslərin bərpa mərkəzlərində tibbi xidmətlərlə yanaşı, sosial, ailəyə dəstək, reabilitasiya, abilitasiya, peşə təlimi kimi xidmətlərlə də təmin edilməsidir. Bu isə BMT-in Əlilliyi olan Şəxslərin Hüquqlarına dair Konvensiyasının və ölkə Konstitusiyasının tələblərinin icrası üçün mühüm əhəmiyyət kəsb edir. Görüşdə layihənin uğurlu icrası ilə bağlı qarşıda duran məsələlər müzakirə olunub.
Qeyd edək ki, "Sosial Xidmətlər Təşəbbüsü" İB-nin partnyoru olan və mərkəzi Brüsseldə yerləşən Avropa Reabilitasiya Platforması əlillərin bərpa mərkəzlərinin işinin qabaqcıl beynəlxalq təcrübəyə uyğunlaşdırılmasına dair strategiyanın hazırlanmasında iştirak edəcəklər. Nazirliyin Əlillərin sosial müdafiəsi siyasəti şöbəsi ilə birgə icra olunan layihə çərçivəsində həmin təşkilatın nümayəndələri Donal Makananey və Klod Delfoz iyunun 11-dən 15-dək pilot mərkəz kimi seçilmiş Protez-Ortopedik Bərpa Mərkəzində və Sumqayıt Əlillərin Bərpa Mərkəzində ilkin qiymətləndirməni həyata keçirəcək və əldə olunmuş nəticələr digər 12 bərpa mərkəzi üçün uyğun hesab ediləcək. Qiymətləndirmənin nəticələri nazirliyə təqdim edildikdən sonra təklif olunmuş istiqamətlərdə işlərin görülməsinə başlanacaq.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
081218_2.jpg)
.jpg)
