Azərbaycan, Bakı, 14 yanvar /Trend/
2012-ci ilin yekunu ilə bağlı bir sıra respublika tədbirləri keçirildi. Bu tədbirlərdən Odlar Yurdu Universitetinin Tələbə gənclər Təşkilatı (TGT) baxımından ən yadda qalanı Respublika Tələbə gənclər Təşkilatları İttifaqının və Nərimanov Rayon İcra Hakimiyyətinin keçirdiyi tədbirlər oldu.
Belə ki, bu tədbirlərdə OYU TGT-nin 5 üzvü - Tərcümə və pedaqogika fakültəsinin 72-ci qrup tələbəsi Əliyeva Leyla, 930x qrup tələbəsi Abbasova Aysel, Tibb fakültəsinin 824-cü qrup tələbəsi Budaqova Ayşən, Riyaziyyat, İnformatika və Texniki fənlər fakültəsinin 762-ci qrup tələbələri Əzizova Günel və Əliyeva Sevinc Respublika Tələbə Gənclər Təşkilatları İttifaqındakı fəaliyyətlərinə görə fəxri fərmanla təltif olundular.
Tələbə Gənclər Təşkilatının sədri Əliyeva Sitarə isə Dövlət gənclər siyasətinin uğurla həyata keçirilməsi istiqamətindəki fəaliyyətinə görə "2012-ci ilin ən fəal gənci" adına layiq görülərək fəxri fərmanla və qiymətli hədiyyə ilə təltif olundu.
